इगतपुरीनामा न्यूज – इगतपुरी तालुक्यातील शिरसाठे ग्रामपंचायत अंतर्गत येणाऱ्या जिल्हा परिषद प्राथमिक शाळा, सप्रेवाडी येथील षटकोनी इमारत आणि किचन शेड अत्यंत दयनीय व धोकादायक स्थितीत आले आहे. या इमारतीचे स्लॅब गळत असून भिंतींना मोठे तडे गेले आहेत. येथील आदिवासी विद्यार्थ्यांच्या सुरक्षेचा प्रश्न ऐरणीवर आल्यामुळे ही इमारत तातडीने नवीन बांधून मिळावी, अशी मागणी शाळा व्यवस्थापन समितीने शिरसाठे ग्रामपंचायतीकडे केली आहे. लोकनियुक्त सरपंच सुनिता दत्ता सदगीर यांच्यासह शाळा व्यवस्थापन समितीचे अध्यक्ष आणि सदस्य यांनी प्रत्यक्ष पाहणी केली असता, इमारतीचा स्लॅब गळत असल्याचे आणि भिंतींना मोठे तडे गेल्याचे निदर्शनास आले. किचन शेडच्या चोहोबाजूला पत्रे असल्याने उंदीर आणि घुशी मोठ्या प्रमाणावर आत प्रवेश करतात, ज्यामुळे कडधान्य व इतर अन्नाचे मोठे नुकसान होत आहे. केंद्र प्रमुख यांनी शाळेला भेट दिली होती. या पाहणीदरम्यान त्यांनी ” ह्या इमारतीत विद्यार्थांना बसवू नये” असा स्पष्ट शेरा मारला आहे. विद्यार्थ्यांच्या दृष्टीने दोन्ही इमारती धोकादायक व घातक ठरत असल्याने, नवीन इमारत तातडीने बांधून मिळावी असा एकमुखी ठराव मंजूर करण्यात आला. ह्या शाळेत शिकत असलेले सर्व विद्यार्थी आदिवासी समाजाचे असून या प्रकरणी तातडीने लक्ष घालावे अशी मागणी ग्रामस्थांनी केली आहे. सप्रेवाडी जिल्हा परिषद शाळेला नवीन इमारत बांधण्यासाठी प्रशासनाकडे तातडीने पाठपुरावा करण्यात येईल. राज्याचे शिक्षणमंत्री ना. दादा भुसे, जिल्हाधिकारी, मुख्य कार्यकारी अधिकारी यांना भेटून नवी इमारत मिळवण्यासाठी मी स्वतः कृतिशील आहे अशी माहिती सरपंच सुनीता दत्त्ता सदगीर यांनी दिली.
