इगतपुरीनामा न्यूज – इगतपुरी तालुक्यात ‘छत्रपती शिवाजी महाराज महाराजस्व समाधान शिबीर अभियानाची ७ मार्चला सकाळी १० वा घोटी मंडळापासुन सुरुवात करण्यात येणार आहे. अभियानाच्या टप्पा १ अंतर्गत नागरिकांच्या विविध शासकीय प्रश्नांचे तात्काळ निराकरण करण्यावर भर दिला जाणार आहे. या शिबिरामध्ये शेतकरी, ज्येष्ठ नागरिक, विद्यार्थी व महिला यांना तुकडेबंदी नियमाधीकरण, वर्ग २ जमिनीचे वर्ग १ जमिनीत रुपांतरण,जिवंत ७/१२ अंतर्गत ७/१२ दुरुस्ती, नवीन व दुय्यम रेशनकार्ड, पीएम किसान व ॲग्रीस्टॅक योजनेची नोंदणी, शेतरस्ते व पाणंद ररते खुले करणे, उत्पन्न, जात, नॉनक्रिमीलेअर व इतर प्रमाणपत्र, संजय गांधी, इंदिरा गाधी, श्रावणबाळ योजनेचे लाभ, ई-हक्क प्रणाली अंतर्गत वारस नोंदी, प्रलंबित फेरफार नोंदी निपटारा,बिनशेती व भुसंपादन क.जा.प अंतर्गत ७/१२ दुरुस्ती, गोपीनाथ मुंढे शेतकरी अपघात विमा प्रमाणपत्र वाटप, कृषी यंत्राचे लाभवितरण, सर्वासाठी घरे अंतर्गत घरकुल योजना, आरोग्य तपासणी शिबीर, ई-जमिन मोजणी, बिनशेती कायदा सुधारणा माहिती या विविध योजनांचा लाभ घेता येणार आहे. यावेळी विविध शासकीय सेवा एकाच ठिकाणी उपलब्ध करून दिल्या जाणार आहेत. विशेष म्हणजे या शिबीरामध्ये तुकडेबंदी कायद्याअंतर्गत खरेदी विक्री झालेल्या नोंदी नियमित करण्यात येणार आहे. तालुक्यातील ८ मंडळ मुख्यालयांवर सकाळी दहा ते पाच वाजता ही शिबिरे होणार असून शिबीराचे उदघाटन व विविध शासकीय सेवांचे वितरण तालुक्याचे आमदार हिरामण खोसकर यांच्या हस्ते करण्यात येणार आहे. या शिबिरात शेतकरी, विद्यार्थी, महिला व जेष्ठ नागरीक यांनी जास्तीत जास्त शासकीय सेवांचा लाभ घेण्याचे आवाहन सहाय्यक जिल्हाधिकारी तथा इगतपुरी त्र्यंबकचे प्रांताधिकारी डॉ. जी. व्ही. एस पवनदत्ता, इगतपुरीचे तहसिलदार अभिजीत बारवकर यांनी केले आहे. ७ मार्चला घोटी बुद्रुकला मातोश्री मंगल कार्यालय, १४ मार्चला टाकेद बुद्रुक येथे रामसिता लॉन्स, सर्वतिर्थ टाकेद, १० एप्रिलला वाडीवऱ्हे मंडळात लक्ष्मी लॉन्स, गोंदे दुमाला, १७ एप्रिलला धारगाव मंडळात भावली बुद्रुक नविन गावठाण सभागृह, ८ मे रोजी इगतपुरी, १५ मे रोजी नांदगाव बुद्रुक मंडळात सभामंडप साकुर याप्रकारे मंडळ निहाय शिबिरे आयोजित केली आहेत अशी माहिती सहाय्यक जिल्हाधिकारी तथा इगतपुरी त्र्यंबकचे प्रांताधिकारी डॉ. जी. व्ही. एस पवनदत्ता, इगतपुरीचे तहसिलदार अभिजीत बारवकर यांनी दिली.
