इगतपुरीनामा न्यूज – शिक्षक, अधिकारी, कर्मचारी स्पर्धा अंतर्गत आयोजित राज्यस्तरीय डॉक्युमेंट्री स्पर्धेत डॉक्युमेंट्री तयार करण्यासाठी १० विषय देण्यात आले होते. त्यापैकी “शिक्षणातील लोकसहभाग” या विषयावर सिध्दार्थ सपकाळे यांनी अत्यंत प्रभावी, आशयपूर्ण व अभ्यासपूर्ण डॉक्युमेंट्रीची निर्मिती केली. या डॉक्युमेंटरी स्पर्धेत राज्यातील विभाग स्तरावरून ४० शिक्षक व अधिकारी स्पर्धक यांचा समावेश होता. या स्पर्धेत राज्यस्तरावर सिध्दार्थ सपकाळे यांनी टॉप १० स्पर्धकांमध्ये स्थान मिळवत दुसरा क्रमांक पटकावला. नाशिक विभाग स्तरावर त्यांच्या डॉक्युमेंटरीला तिसरा क्रमांक मिळाला होता. त्यांच्या या उल्लेखनीय कामगिरीमुळे राज्यस्तरावर त्यांच्या सर्जनशीलतेस व शैक्षणिक जाणिवेला विशेष दाद मिळाली आहे. सिध्दार्थ सपकाळे हे इगतपुरी तालुक्यातील टिटोली जिल्हा परिषद आदर्श सेमी इंग्रजी शाळेत पदवीधर शिक्षक म्हणून कार्यरत आहेत. त्यांच्या यशामुळे शाळेच्या शैक्षणिक व सर्जनशील कार्याची राज्यस्तरावर गौरवपूर्ण दखल घेण्यात आली आहे. यापूर्वीही राज्यस्तरीय शैक्षणिक व्हिडीओ निर्मिती स्पर्धेत ६ वी ते ८ वी गटातील गणित विषयाच्या व्हिडीओ निर्मिती मध्ये राज्यात प्रथम क्रमांक मिळवला आहे. त्यांचे भरीव यश इगतपुरीकरांसाठी अभिमानास्पद ठरले आहे. शाळा व्यवस्थापन समिती अध्यक्ष अनिल भोपे, गटशिक्षणाधिकारी निलेश पाटील, विस्ताराधिकारी प्रमोद चिंचोले, किशोर सोनवणे, मंजुषा साळुंखे, केंद्रप्रमुख अशोक दराडे, मुख्याध्यापक अशोक बोऱ्हाडे, मंगला शार्दुल, शिक्षक, शिक्षक संघटनांचे पदाधिकारी यांनी त्यांचे अभिनंदन केले आहे.
