इगतपुरीनामा न्यूज – नाशिक, त्र्यंबकेश्वरच्या आगामी सिंहस्थ कुंभमेळ्याच्या पार्श्वभूमीवर इगतपुरी तालुक्यातील व्हिटीसीफाटा ते साकुरफाटा रस्त्याचे काम सुरू करण्यात आलेले आहे. या कामाचा आढावा घेण्यासाठी नाशिक त्र्यंबकेश्वर कुंभमेळा प्राधिकरणाचे अध्यक्ष तथा नाशिकचे विभागीय आयुक्त डॉ. प्रवीण गेडाम यांनी कामाच्या ठिकाणी भेट दिली. सुरु असलेल्या कामांची गती व गुणवत्तेची पाहणी करून त्यांनी समाधान व्यक्त केले. आगामी सिंहस्थ कुंभमेळ्याच्या पार्श्वभूमीवर भाविकांना सुरक्षित सुलभ वाहतुकीसाठी रस्त्याची गुणवत्ता अत्यंत महत्त्वाची असल्याने कामे काटेकोरपणे पूर्ण करण्यावर भर देण्यात यावा. गुणवत्ता नियंत्रण चाचण्या नियमितपणे घेऊन कामाचा वेग व दर्जा दोन्ही राखण्याच्या सूचना विभागीय आयुक्त डॉ. प्रवीण गेडाम यांनी अधिकाऱ्यांना दिल्या. यावेळी रस्त्याच्या नियंत्रण चाचण्या घेण्यात आल्या. सार्वजनिक बांधकाम विभागाचे कार्यकारी अभियंता नवनाथ सोनवणे, इगतपुरीचे उपविभागीय अभियंता शशांक गजभिये, शाखा अभियंता तुषार मोरे, सुनील वाघ, गौरव जाधव आदी उपस्थित होते.
