इगतपुरीनामा न्यूज, दि. १२ – इगतपुरी शहरातील मध्यवर्ती ठिकाणी असलेल्या इगतपुरी नगरपरिषदेच्या लोकशाहीर अण्णाभाऊ साठे वाचनालयातील १०० वर्ष जुना असलेल्या महाकाय नारळाचे झाड संरक्षक भिंत आणि विद्युत तारांवर कोसळले. नशीब बलवत्तर म्हणून झाड कोसळत असताना परिसरातील काही युवकांना आवाज आला. त्यांनी त्वरित परिसरातील नागरिकांना बाजूला केले. यामुळे मोठी जिवीत हानी टळली. स्थानिक मुलांनी झाड पडतानाचे थरारक व्हिडिओ आपल्या मोबाईलमध्ये चित्रित केले आहे. महावितरणच्या कर्मचाऱ्यांनी तात्काळ घटनास्थळी पोहचून विद्युत पुरवठा खंडित केला आहे. इगतपुरी नगरपरिषदेच्या कर्मचाऱ्यांनी झाड बाजूला करण्यास सुरुवात केली आहे.