इगतपुरीनामा न्यूज – खुनाच्या गंभीर गुन्ह्यात मागील ४ वर्षांपासून पोलिसांना गुंगारा देणारा आणि फरारी असलेला मुख्य आरोपी अखेर नाशिक ग्रामीण स्थानिक गुन्हा शाखेच्या जाळ्यात अडकला आहे. स्थानिक गुन्हा शाखेच्या पथकाने अत्यंत चलाखीने कारवाई करत या कुख्यात आरोपीच्या मुसक्या आवळल्या आहेत. इगतपुरी पोलीस ठाण्यात दाखल असलेल्या गंभीर स्वरूपाच्या गुन्ह्यात (गुन्हा नोंद क्र. ०९/२०२२) भारतीय दंड संहितेच्या कलम ३०२ (खून), ३०७, १२० (ब) आणि आर्म ऍक्ट कलम ४/२५ अन्वये हा गुन्हा नोंदवण्यात आला होता. या गुन्ह्यापासूनच आरोपी प्रदीप चंदू उर्फ (चंद्रकांत) भागडे, वय २३, रा. नांदगाव सदो, ता. इगतपुरी, जि. नाशिक हा गेल्या ४ वर्षांपासून फरार होता आणि पोलिसांचा शोध सुरू होता. आज इगतपुरी पोलीस स्टेशन हद्दीतील पिंप्री सदो येथे उरूस उत्सव बंदोबस्तात स्थानिक गुन्हे शाखेचे पथक तैनात होते. दरम्यान, वरिष्ठांच्या मार्गदर्शनाखाली सुरू असलेल्या पाहिजे/फरार आरोपींच्या विशेष शोध मोहिमेदरम्यान या गुन्ह्यातील फरार आरोपी प्रदीप भागडे हा पिंप्री सदो परिसरात येणार असल्याची खात्रीशीर माहिती पोलिसांना मिळाली. त्यानुसार, स्थानिक गुन्हे शाखेचे पोलीस उपनिरीक्षक सुदर्शन बोडके, पोलीस हवालदार प्रवीण काकड, संतोष दोंदे, नवनाथ शिरोळे आणि सतीश घुटे यांच्या पथकाने तात्काळ सापळा रचून आरोपीला शिताफीने ताब्यात घेतले.आरोपीला यशस्वीरीत्या ताब्यात घेतल्यानंतर स्थानिक गुन्हे शाखेच्या पथकाने त्यास पुढील कायदेशीर व कायदेशीर कारवाईसाठी इगतपुरी पोलीस स्टेशनच्या ताब्यात दिले आहे. पोलिसांच्या या धडक कारवाईमुळे चार वर्षांपासून फरारी असलेला आरोपी अखेर कायद्याच्या चौकटीत अडकला आहे. स्थानिक गुन्हे शाखेच्या पथकाने दाखवलेल्या या तपासी तत्परतेमुळे आणि कामगिरीमुळे परिसरातील नागरिकांमधून पोलिसांचे कौतुक होत आहे.
