इगतपुरीनामा न्यूज – दरेवाडी जिल्हा परिषद प्राथमिक शाळेत नुकतीच शिक्षण परिषद संपन्न झाली. प्रतिकूल परिस्थिती, भौगोलिक दुर्गमता आणि मर्यादित संसाधने असूनही शाळा व्यवस्थापन व शिक्षकांच्या समन्वयातून ही परिषद उपस्थितांसाठी प्रेरणादायी ठरली. प्रारंभी विद्यार्थिनींनी पारंपारिक आदिवासी पेहरावात उपस्थितांचे स्वागत केले. मुख्याध्यापक संजय गातवे यांनी विद्यार्थ्यांसह स्वागतगीत तर शिक्षक महेश खैरनार यांनी ईशस्तवन गायले. शिक्षिका वंदना सोनार यांनी प्रास्ताविकात दरेवाडी शाळेची यशोगाथा मांडली. जनार्दन केकरे यांनी क्षेत्र भेटीचे नियोजन व महत्त्व, कमलेश शिरोडे यांनी निपुण भारत अंतर्गत भाषा आकलनयुक्त वाचन, दत्तू साबळे यांनी गुणाकाराची सोपी तंत्रे, जितेंद्र भदाणे यांनी शाळा व्यवस्थापन समिती व लोकसहभागाचे महत्त्व या घटकांवर तांत्रिक कौशल्यांचा वापर करून अभ्यासपूर्ण शैक्षणिक सत्रे घेतली. भरवजचे मुख्याध्यापक दगडू परमार यांनी परिषदेसाठी स्मार्ट टीव्हीचे सहकार्य केले. काळुस्ते केंद्र समन्वयकांनी प्रशासकीय विषयांचा आढावा घेत आदर्श नियोजन केल्याबद्दल अभिनंदन केले. शिक्षक संजय गातवे, महेश खैरनार व वंदना सोनार यांचा शिक्षकांकडून गौरव करण्यात आला. सामुदायिक वंदे मातरम् गायनाने व “जय दरेवाडी” या घोषवाक्याने कार्यक्रमाची सांगता झाली.