इगतपुरीनामा न्यूज – साकूरफाटा बेलगाव कुऱ्हे व्हिटीसी फाटा राज्यमार्ग क्र. ३७ च्या रुंदीकरण कामात बाधित होणाऱ्या वडाच्या वृक्षांच्या संदर्भात सार्वजनिक बांधकाम विभाग, नाशिक तसेच राष्ट्रीय हरित न्यायाधिकरणात दाखल अर्ज क्र. १६४-१६५ अंतर्गत अर्जदार अश्विनी सुनील भट, मनीष बाविस्कर, अमित कुलकर्णी यांच्या उपस्थितीत संयुक्त स्थळ पाहणी करण्यात आली. या पाहणीदरम्यान रस्त्याची भूमिती, उपलब्ध जागा व सुरक्षिततेचे निकष लक्षात घेऊन बाधित होणान्या वृक्षांचे संयुक्त सर्वेक्षण करण्यात आले. तांत्रिकदृष्टया शक्य असलेल्या ठिकाणी रस्त्याच्या संरेखनात बदल करून जास्तीत जास्त वड वृक्ष वाचवण्यावर भर देऊन आवश्यकतेनुसार योग्य वृक्षांचे पुनरोपण करण्याचे पर्यायही तपासण्यात आले.
या रस्त्यावर असलेले ब्रिटिशकालीन वटवृक्ष जतन करण्यासाठी आम्ही अधिकाऱ्यांसह संयुक्त पाहणी केली. रुंदीकरणासाठी आवश्यक ठिकाणी संरेखनात बदल करून वृक्ष वाचवण्याचा सकारात्मक निर्णय विभागाने घेतला असून बाधित होणाऱ्या वृक्षांचे पुनरोपण करावे, ही आमची मागणी आहे
- अश्विनी भट
सदर संयुक्त पाहणी दरम्यान रुंदीकरण कामात ठिकठिकाणी रस्त्याच्या भूमितीत आवश्यक बदल करून वाचविण्यात आलेले वडाचे वृक्ष विभागाने निसर्गसेवकांच्या निदर्शनात आणून दिले तसेच रुंदीकरणात बाधित होणारे वृक्षांचे पुनरोपण करण्याची मागणी निसर्गसेव- अमित कुलकर्णी, निसर्गसेवककांनी केली. विकासाच्या कामांसोबत पर्यावरणाचे संवर्धन करण्याचा हा प्रयत्न नक्कीच दिशादर्शक ठरणार असून, प्रशासन व नागरिक यांच्यातील समन्वयाचे उत्तम उदाहरण ठरले आहे. सदर पाहणी दरम्यान दारणा धरण परिसरात वृक्षारोपणाची संयुक्त मोहीम राबविण्यात आली. रुंदीकरण काम पूर्ण झाल्यानंतर रस्त्याच्या दुतर्फा योग्य अंतरावर ६-८ फूट उंचीचे वृक्षारोपण करण्याचे नियोजित असल्याची माहिती सार्वजनिक बांधकाम विभागामार्फत देण्यात आली.
“ही फक्त २०० झाडे वाचवण्याची लढाई नाही, तर विकास आणि पर्यावरणाचा समतोल साधण्याचा प्रयत्न आहे. प्रशासनाने घेतलेली सकारात्मक भूमिका स्वागतार्ह आहे. संयुक्त सर्वेक्षणातून जास्तीत जास्त झाडे वाचवता येतील, असा विश्वास आहे. व्हिटीसी साकूर फाट्यापासून सुरू झालेला हा उपक्रम संपूर्ण नाशिक जिल्ह्यात पोहोचवण्याची गरज आहे.
– अमित कुलकर्णी, निसर्गसेवक
शतायु वटवृक्षाचे संरक्षण करत रस्त्याचा सुरक्षित पर्याय शोधण्यासाठी प्रशासन व पर्यावरणप्रेमी यांचा आज झालेला संयुक्त पाहणी दौरा निश्चितच दिशादर्शक ठरणार आहे. विकास आणि पर्यावरण यांचा समतोल राखत घेतलेली ही सकारात्मक भूमिका समाजासाठी आदर्श ठरेल.
या उपक्रमात सक्रिय सहभाग घेऊन संवेदनशीलतेने निर्णय प्रक्रिया पुढे नेणाऱ्या सार्वजनिक बांधकाम विभागाच्या सर्व अधिकाऱ्यांचे मनःपूर्वक अभिनंदन व आभार.
– मनीष बाविस्कर, निसर्गसेवक
