इगतपुरीनामा न्यूज – घोटी पोलिसांनी नाशिक-मुंबई महामार्गावरील घोटी टोल नाक्याजवळ मोठी कारवाई करत महाराष्ट्र दारूबंदी कायद्यांतर्गत २४ लाख ४७ हजार ९२० रुपयांचा विदेशी दारू, वाहने व मोबाईल असा मुद्देमाल जप्त केला असून तिघांना अटक केली आहे. याप्रकरणी घोटी पोलीस ठाणे येथे गुन्हा क्रमांक 239/2026 महाराष्ट्र दारूबंदी कायदा कलम 65(A)(E), 80, 81, 83, 90, 93 व 108 अन्वये गुन्हा दाखल करण्यात आला आहे. याबाबतची फिर्याद पोलीस हवालदार गौरव मधुकर सोनवणे यांनी दिली. अटक आरोपींमध्ये चेतन धनराज पुरोहित (वय 38, जि. जालोर, राजस्थान), परवीन गणेशराम बिश्नोई (वय 23, चालक, जि. पाली, राजस्थान) आणि अंकुलकुमार गिरीषभाई गामीत (वय 30, जि. तापी, गुजरात) यांचा समावेश आहे. पोलिसांनी केलेल्या कारवाईत अँटिक्विटी ब्ल्यू, ब्लेंडर्स प्राईड, रॉयल चॅलेंज, रॉयल स्टॅग, इम्पिरियल ब्ल्यू, मॅकडॉवेल्स नं. 1, आयकॉनिक व्हाईट, मॅजिक मोमेंट व्होडका तसेच बडवायझर प्रीमियम बिअरसह विविध ब्रँडच्या विदेशी मद्याच्या बाटल्या जप्त केल्या. या सर्व बाटल्यांवर “For Sale in U.T. of Dadra and Nagar Haveli and Daman & Diu Only” असा उल्लेख असल्याचे पोलिसांनी सांगितले. याशिवाय दोन चारचाकी वाहने (हुंदाई क्रेटा व मारुती सुझुकी ब्रेझा) तसेच ३ मोबाईल फोन असा मुद्देमालही जप्त करण्यात आला. जप्त विदेशी दारूची किंमत ५ लाख ९७ हजार ९२० रुपये असून वाहने व मोबाईलसह एकूण जप्त मुद्देमालाची किंमत २४ लाख ४७ हजार ९२० रुपये इतकी आहे. ही कारवाई सोमवारी रात्री सव्वा अकरा वाजण्याच्या सुमारास नाशिक-मुंबई महामार्गावरील घोटी टोल नाक्याजवळ नाशिककडे जाणाऱ्या लेनवर करण्यात आली. आरोपी सिल्वासा येथून विदेशी दारू आणून गुजरात राज्यात विक्रीसाठी वाहतूक करत असल्याची माहिती पोलिस तपासात समोर आली आहे. तिन्ही आरोपींना अटक करण्यात आली असून पुढील तपास घोटी पोलीस करीत आहेत. ही धडक कारवाई पोलीस निरीक्षक विजय शिंदे, हवालदार संतोष नागरे, गौरव सोनवणे, श्रीकांत खैरे, प्रकाश कासार, निलेश साळवे, मिलींद पवार, प्रभू ठोंबरे, प्रवीण कोरडे यांनी केली.
