इगतपुरीनामा न्यूज – मतदार यादी विशेष सखोल पुनरीक्षण मोहिमेत प्रत्येक पात्र नागरिकाची अचूक नोंद होणे ही लोकशाही बळकट करण्यासाठी आवश्यक बाब आहे. या मोहिमेत बूथ लेव्हल अधिकारी (बीएलओ) यांना नागरिकांनी पूर्ण सहकार्य करावे असे आवाहन इगतपुरीचे तहसीलदार अभिजीत बारवकर यांनी केले. इगतपुरी तहसील कार्यालयात आयोजित बीएलओ व बीएलए यांच्या आढावा बैठकीत ते बोलत होते. यावेळी त्यांनी विशेष पुनरीक्षण मोहिमेच्या प्रगतीचा आढावा घेतला. निवडणूक नायब तहसीलदार वर्षा वाघ, नपा कार्यालय प्रमुख रमेश राठोड, सार्वजनिक बांधकाम खात्याचे अभियंता अनिल बैसाणे, पुरवठा निरीक्षण अधिकारी ललित पाटील, निवडणूक शाखेचे अधिकारी, बीएलओ आणि बीएलए उपस्थित होते.
तहसीलदार श्री. बारवकर यांनी घरभेटीद्वारे माहिती संकलित करणाऱ्या बीएलओंनी प्रत्येक पात्र नागरिकापर्यंत पोहोचून मतदार नोंदणी, माहितीची पडताळणी, मृत, स्थलांतरित आणि दुबार मतदारांची नोंद अद्ययावत करण्याचे काम काटेकोरपणे करावे, असे निर्देश दिले. बीएलओ आणि बीएलए यांनी परस्पर समन्वय ठेवून मोहिमेची प्रभावी अंमलबजावणी करण्यावरही त्यांनी भर दिला. नागरिकांनीही आवश्यक कागदपत्रे वेळेत उपलब्ध करून देऊन अचूक माहिती द्यावी. नाव, पत्ता किंवा इतर तपशीलात बदल असल्यास तत्काळ बीएलओंकडे नोंद करावी. घरातील मृत किंवा स्थलांतरित मतदारांची माहितीही प्रशासनाला द्यावी. यामुळे मतदार यादी अधिक पारदर्शक, विश्वासार्ह आणि त्रुटीरहित होण्यास मदत होईल, असेही तहसीलदार बारवकर यांनी स्पष्ट केले. यावेळी उपनगराध्यक्ष मंगेश शिरोळे, नगरसेविका आशाताई थोरात उपस्थित होते.
विशेष सखोल मतदार यादी पुनरीक्षण मोहिमेत सर्व नागरिकांनी प्रशासनाने निवडणूक आयोगाला सहकार्य करावे. प्रत्येक पात्र मतदाराने आपले नाव मतदार यादीत समाविष्ट आहे की नाही, याची खात्री करून अवश्य असल्यास दुरुस्ती किंवा नोंदणीची प्रक्रिया पूर्ण करावी.
- फिरोजभाई पठाण, गटनेते, इगतपुरी नगरपरिषद
