इगतपुरीनामा न्यूज – हवामान विभागाच्या अंदाजानुसार उद्या ७ जुलै रोजी नाशिक जिल्ह्यात ढगफुटी सदृश्य पावसाची शक्यता वर्तवण्यात आली आहे. या पार्श्वभूमीवर संपूर्ण नाशिक जिल्ह्यात प्रशासकीय यंत्रणेला ‘हाय अलर्ट’वर राहण्याचे निर्देश देण्यात आले आहेत. वाडीवऱ्हे पोलीस ठाण्याचे पोलीस निरीक्षक धीरज महाजन यांनी या अनुषंगाने महत्त्वाच्या सूचना जारी केल्या असून, गावागावांत दक्षता घेण्याचे आवाहन केले आहे. ढगफुटी सदृश्य पावसाच्या काळात नागरिकांनी विनाकारण घराबाहेर पडू नये. सतर्क राहावे आणि कोणत्याही अफवांवर विश्वास ठेवू नये. नदीपात्रे, बॅकवॉटर आणि धबधबे परिसरात जाण्यास सक्त मनाई करण्यात आली आहे. विनाकारण अशा ठिकाणी फिरणाऱ्यांवर पोलिसांकडून कडक कारवाई केली जाईल, असा इशारा देण्यात आला आहे. पावसाचा अंदाज घेऊन शेतकऱ्यांनी आपल्या शेतीची आणि जनावरांची योग्य खबरदारी घ्यावी असे त्यांनी कळवले आहे. वरिष्ठांच्या आदेशानुसार पोलीस पाटलांना निर्देश दिले आहेत की, त्यांनी त्वरित आपल्या कार्यक्षेत्रातील ग्रामसेवक, तलाठी आणि इतर संबंधित शासकीय कर्मचाऱ्यांना या ‘हाय अलर्ट’ची माहिती द्यावी. संभाव्य आपत्ती टाळण्यासाठी प्रशासनाने आतापासूनच कंबर कसली आहे. गावात जीर्ण किंवा पडकी घरे, झोपड्यांमध्ये राहणाऱ्या नागरिकांनी सुरक्षित स्थळी आश्रय घ्यावा. अशा नागरिकांच्या निवासाची व्यवस्था शाळा, ग्रामपंचायत हॉल किंवा समाजभवनांमध्ये करण्याचे आदेश देण्यात आले आहेत. कोणत्याही प्रकारचा अनुचित प्रकार घडू नये यासाठी गावातील मदत करणाऱ्या प्रशिक्षित लोकांची यादी तयार ठेवण्याच्या सूचना देण्यात आल्या आहेत. आपत्कालीन परिस्थितीत नागरिकांनी तात्काळ संबंधित कार्यालय किंवा वाडीवऱ्हे पोलीस ठाण्याशी संपर्क साधावा, असे आवाहन पोलीस निरीक्षक धीरज महाजन यांनी केले आहे.
