इगतपुरीनामा न्यूज – नाशिक जिल्हा सत्र न्यायालयात नाशिक तालुका पोलीस ठाणे गु.र.न.१८/२०२६ भारतीय न्याय संहिता कलम ६४(२),७४,१३७ (२), पोक्सो ८,१२ प्रमाणे दाखल खटल्याची सुनावणी आज पुर्ण झाली. ह्या गुन्ह्यातील आरोपी साईनाथ रविंद्र थोरात वय २७ रा. विल्होळी ता. जि. नाशिक याच्या विरूद्ध आरोप सिध्द झाल्याने न्यायालयाने त्याला भारतीय न्याय संहिता कलम ७४,१३७ (२) मध्ये दोषी ठरवुन ५ वर्षे सश्रम कारावास व २५ हजार रूपये दंड व दंड न भरल्यास ६ महिने साधी कैद २) पोक्सो ८ मध्ये ५ वर्ष सश्रम कारावास व २५ हजार रूपये दंड व दंड न भरल्यास १ वर्ष साधी कैद ३) पोक्सो १२ मध्ये ३ वर्ष सश्रम कारावास व १० हजार रूपये दंड व दंड न भरल्यास ३ महिने साथी कैद ४) आरोपीला ८५ हजार रूपये दंड ठोठाविण्यात आला. त्यापैकी ८० हजार रुपये पिडीतेस भरपाई म्हणुन देण्यात यावी व ५ हजार रुपये दंड शासन जमा करण्यात यावा अशी शिक्षा सुनावण्यात आली आहे.
ही घटना १४ जानेवारी २०२६ रोजी रात्री साडेआठच्या सुमाराला विल्होळी माध्यमिक शाळेच्या मंदिराजवळ ता. नाशिक येथे घडली होती. यातील आरोपीने फिर्यादीची मुलगी पिडीता वय ८ वर्ष हिस गाडीवरून फिरवुन आणतो असे आमिष दाखवले. तिच्या अल्पवयीन पणाचा फायदा घेवुन घराजवळून १ किमी अंतरावर माध्यमिक शाळा विल्होळी येथे घेवुन जावुन निर्जन स्थळ व अंधाराचा फायदा घेवुन पिडीत मुलीला चुप रहा नाहीतर मारून टाकेन असा दम दिला. यांनातर शाळेतील मंदिराच्या जवळ तिच्यावर लैंगिक अत्याचार केला होता. ह्या गुन्ह्याचा तपास महिला पोलीस निरीक्षक मृदुला नाईक यांनी केला होता. त्यांनी आरोपी विरुध्द भक्कम पुरावे गोळा करून सत्र न्यायालयात दोषारोप पत्र दाखल केले होते. ह्या खटल्यात सरकारी अभियोक्ता लीना चव्हाण यांनी, पैरवी अंमलदार महिला पोहवा गांगुर्डे, पो. हवा. कऱ्हाड यांनी कामकाज पाहिले. यातील आरोपीविरूध्द गुन्हा शाबीत झाला आहे. गुन्हे दोषसिध्दी विभाग नाशिक येथील सपोनि श्रीकांत पाटील,महिला पोलीस अंमलदार अश्विनी परदेशी यांनी हा गुन्हा शाबीत होण्याच्या अनुषंगाने वेळोवेळी कायदेशीर मार्गदर्शन करून पाठपुरावा केला. ह्या गुन्ह्यात केलेल्या उल्लेखनीय कामगिरीबद्दल पोलीस अधीक्षक बाळासाहेब पाटील व अपर पोलीस अधीक्षक आदित्य मिरखेलकर यांनी सर्वांचे विशेष अभिनंदन केले आहे.
