इगतपुरीनामा न्यूज – निवडणूक आयोगाकडून लवकरच मतदार यादी विशेष सखोल पुनरिक्षण कार्यक्रम घोषित केला जाणार आहे. त्यादृष्टीने पूर्वतयारी म्हणून ज्या मतदारांचे नाव सन २०२४ च्या मतदार यादीत आहे त्याचे सन २००२ च्या मतदार यादीतील नावाशी मॅपिंग करणे, ज्या मतदाराचे नाव सन २०२४ च्या मतदार यादीत आहे, परंतु त्याचे सन २००२ च्या मतदार यादीत नाव नाही अशा मतदारांचे आई-वडील किंवा आजी-आजोबा यांच्या नावाचे सन २००२ च्या मतदार यादीमधील नावाशी मॅपिंग करणे, ज्या मतदारांचे नाव सन २०२४ च्या मतदार यादीत आहे, परंतु त्या मतदारांचे आई वडील किंवा आजी आजोबा यांचे नाव सन २००२ च्या मतदार यादीत नाही, अशा मतदारांच्या राहत्या ठिकाणी मतदान केंद्रस्तरीय अधिकारी (BLO) हे प्रत्यक्ष गृहभेट देतील. त्यांचे आई-वडील, आजी-आजोबा यांचे मूळ रहिवासाचे ठिकाण याबाबत माहिती घेतील. (ज्यात राज्य, जिल्हा, तालुका, गाव, मतदार यादी भाग क्रमांक, अ. क्र.). ज्या मुली लग्न होऊन आल्या आहेत, त्यांचे नाव सध्याच्या मतदार यादीत आहे, त्यांच्या आई-वडीलांचे नाव सन २००२ मध्ये कोणत्या मतदार संघात होते याबाबत सुध्दा मतदान केंद्रस्तरीय अधिकारी (BLO) माहिती जाणून घेतील. माहिती जाणून घेतल्यानंतर voters.eci.gov.in यावर जाऊन त्या मतदाराचे सन २००२ च्या मतदार यादीशी मॅपिंग करतील. या प्रक्रियेनुसार मतदाराचे नाव मॅप झाले किंवा कसे याबाबतची खात्री करण्यासाठी आपल्या मतदार यादी भागाशी संबंधित मतदान केंद्रस्तरीय अधिकारी (BLO) यांच्याशी संपर्क साधून खात्री करुन घ्यावी. सदर विशेष सखोल पुनरिक्षण कार्यक्रमाच्या पुर्वतयारीसाठी प्रशासनाला सहकार्य करण्याचे आवाहन मतदार नोंदणी अधिकारी तथा सहाय्यक जिल्हाधिकारी तथा इगतपुरी-त्र्यंबकेश्वरचे उपविभागीय अधिकारी जीव्हीएस पवनदत्ता व सहाय्यक मतदार नोंदणी अधिकारी तथा इगतपुरीचे तहसिलदार अभिजित बारवकर यांनी केले आहे.