इगतपुरीनामा न्यूज – सावित्रीबाई फुले पुणे विद्यापीठाचे बहिःशाल शिक्षण मंडळ आणि कला व वाणिज्य महाविद्यालय, इगतपुरी यांच्या संयुक्त विद्यमाने आयोजित ३ दिवसीय ‘डॉ. बाबासाहेब जयकर व्याख्यानमाला’ नुकतीच संपन्न झाली. २८ ते ३० सप्टेंबर या कालावधीत झालेल्या या व्याख्यानमालेत विविध क्षेत्रांतील तज्ज्ञ वक्त्यांनी विद्यार्थ्यांना मार्गदर्शन केले. बहिःशाल शिक्षण मंडळ केंद्र कार्यवाह प्रा. कांतीलाल विष्णू दुनबळे यांनी या व्याख्यानमालेच्या आयोजनामागील उद्देश आणि महत्त्व स्पष्ट केले. या व्याख्यानमालेच्या यशस्वी आयोजनात प्राचार्या प्रतिभा सोनवणे यांच्या मार्गदर्शनाखाली प्रा. शशिकांत सांगळे, प्रा. भाग्यश्री मोरे आणि प्रा. प्रतिभा सकट यांनी मोलाचे योगदान दिले. व्याख्यानमालेचे पहिले विचारपुष्प प्रसिद्ध तज्ज्ञ व्याख्याते दादाजी लक्ष्मण ठाकूर यांनी गुंफले. त्यांनी ‘वेद, उपनिषद आणि भगवद्गीता’ या सखोल आणि आध्यात्मिक विषयावर विद्यार्थ्यांना मार्गदर्शन केले. चार वेदांचे मानवी जीवनातील महत्त्व विशद करून, उपनिषदांचा अर्थ सोप्या भाषेत समजून सांगितला. भगवद्गीतेतील जीवनमूल्ये आत्मसात करण्याचे आवाहन त्यांनी विद्यार्थ्यांना केले. सूत्रसंचालन प्रा. ज्योती सोनवणे यांनी केले, प्रा. रवींद्र नाडेकर यांनी परिचय तर प्रा. सचिन मुसळे यांनी आभार मानले.
सत्राचे दुसरे विचार पुष्पात प्रसिद्ध वक्ता हेमंत बाळासाहेब टिळे यांनी ‘हुतात्मा अनंत कान्हेरे – जॅक्सन वध’ या संवेदनशील विषयावर प्रकाश टाकला. क्रांतीकारकांच्या अलौकिक बलिदानामुळे आपला देश स्वतंत्र झाल्याचे सांगत त्यांनी ऐतिहासिक पार्श्वभूमी मांडली. कार्यक्रमाच्या अध्यक्षस्थानावरून बोलताना प्राचार्या प्रतिभा सोनवणे यांनी क्रांतिकारकांच्या विचारांचे स्मरण ठेवण्याचे आवाहन केले. याप्रसंगी डॉ. बाळू घुटे उपस्थित होते. प्रा. अविनाश कासार यांनी परिचय, प्रा. प्रियंका मोरे यांनी सूत्रसंचालन तर विद्यार्थिनी कु. मनाली नवनाथ गोसावी हिने आभार मानले. तिसरे विचार पुष्प प्रसिद्ध वक्ता डॉ. विश्वनाथ शिंदे यांनी गुंफले. ‘व्यक्तिमत्व आणि व्यक्तिमत्व विकास’ या विषयावर त्यांनी स्वतःचे गुण, दोष ओळखून सकारात्मक बदल घडवण्याची प्रक्रिया समजून सांगितली. मानसिक, शारीरिक, बौद्धिक, सामाजिक आणि भावनिक अशा सर्व बाजूंनी स्वतःला सक्षम बनवण्याचा मोलाचा संदेश त्यांनी दिला. अध्यक्षीय भाषणात प्राचार्या प्रतिभा सोनवणे यांनी विद्यार्थ्यांच्या सर्वांगीण विकासासाठी अशा व्याख्यानांची गरज अधोरेखित केली. प्रा. जयश्री भालेराव यांनी परिचय, प्रा. ज्योती सोनवणे यांनी सूत्रसंचालन तर कु. सोनल सूर्यभान गायकवाड हिने आभार मानले. या प्रेरणादायी उपक्रमाला सर्व प्राध्यापक, प्राध्यापकेतर कर्मचारी आणि विद्यार्थ्यांनी उत्स्फूर्त प्रतिसाद देऊन कार्यक्रमाची शोभा वाढवली.
