इगतपुरीनामा न्यूज – निरपण-भरवज येथील ग्रामपंचायत सांस्कृतिक हॉलमध्ये ‘पोषण अभियान २०२६’ अंतर्गत एका विशेष कार्यक्रमाचे नुकतेच मोठ्या उत्साहात आयोजन करण्यात आले होते. माता, बालक आणि किशोरवयीन मुलींमध्ये आरोग्याविषयी जनजागृती निर्माण करण्याच्या उद्देशाने घेतलेल्या या कार्यक्रमास ग्रामस्थांचा उत्स्फूर्त प्रतिसाद लाभला. एकात्मिक बाल विकास सेवा योजना प्रकल्प इगतपुरीच्या प्रकल्पाधिकारी भारती गेजगे, निरपणच्या सरपंच जाईबाई भले आणि काळुस्तेच्या सरपंच वनिता गवारी यांच्या प्रमुख उपस्थितीत या कार्यक्रमाचा शुभारंभ झाला. यावेळी व्यासपीठावर पर्यवेक्षिका सारिका क्षीरसागर, निलम बांबळे, अलका खांदवे, हर्षदा कुंवर, आरोग्य विभागाच्या परिचारिका उपस्थित होत्या. काळुस्ते बीटामधील सर्व अंगणवाडी सेविका आणि मदतनीसांनी या कार्यक्रमाचे अत्यंत नियोजनबद्ध आयोजन केले होते. कार्यक्रमात अंगणवाडीचे लाभार्थी, पालक आणि किशोरवयीन मुली मोठ्या संख्येने सहभागी झाल्या होत्या. कार्यक्रमादरम्यान पौष्टिक आहाराच्या प्रात्यक्षिकांचे प्रदर्शन, आकर्षक रांगोळी स्पर्धा आणि बालकांसाठी विविध स्पर्धांचे आयोजन करण्यात आले होते. दरेवाडीच्या अंगणवाडी सेविका आनंदी गावंडा यांनी आदिवासी संस्कृती आणि पोषण अभियानावर आधारित एक सुंदर स्वरचित गीत सादर केले. या गीतावर इतर सहकारी सेविका व मदतनीसांनी सादर केलेल्या नृत्यरचनेने उपस्थितांची वाहवा मिळवली. कार्यक्रमाच्या यशस्वीतेसाठी आकाश भले, मुकुंद भले, अजय साळवे आणि शिक्षक श्री. परमार यांचे मोलाचे सहकार्य लाभले. या उपक्रमामुळे ग्रामस्थांमध्ये आरोग्याविषयी आणि पोषणाविषयी महत्त्वपूर्ण संदेश पोहोचला आहे.
