इगतपुरीनामा न्यूज – बिलाच्या मोबदल्यात ५ टक्के कमिशनची मागणी करत तब्बल ४८ हजारांची लाच स्वीकारल्याप्रकरणी लाचलुचपत प्रतिबंधक विभागाने मोठी कारवाई केली आहे. नाशिक ग्रामीणमधील घोटी पोलीस ठाण्यात धारगाव ग्रामपंचायतीचा ग्रामसेवक बाळू अंतु मांगटे, वय ४५, खासगी इसम शांताराम सोनू पादीर वय ३८, सरपंचाचे पती पांडुरंग देवराम पुंजारा वय २३ तिघांविरुद्ध भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू आहे. तक्रारदार हे शासकीय ठेकेदार असून त्यांनी धारगाव ग्रामपंचायतीअंतर्गत ई-निविदा प्रक्रियेद्वारे नळपुरवठा योजना, सार्वजनिक शौचालय आणि भूमिगत गटार यांसारखी सुमारे १३.७० लाखांची ६ विकासकामे पूर्ण केली होती. यातील ५ कामांचे सुमारे ९.७० लाखांचे बिल ठेकेदाराला मिळाले होते. मात्र उर्वरित बिल मंजूर करून देण्यासाठी ग्रामसेवक बाळू मांगटे याने ५ टक्के प्रमाणे ४८ हजार रुपयांच्या लाचेची मागणी केली. लाच न दिल्यास उर्वरित बिल न देण्याची धमकी दिली. या प्रकरणी त्रस्त ठेकेदाराने १३ जुलै २०२६ रोजी एसीबीकडे अधिकृत तक्रार नोंदवली. तक्रारीनुसार एसीबीच्या पथकाने पंचांसमक्ष लाच मागणीची खातरजमा केली. त्यानंतर २८ जुलै रोजी रचलेल्या सापळा कारवाईदरम्यान, ग्रामसेवकाने सरपंचांचे पती पांडुरंग पुंजारा यांना लाच स्वीकारण्यास प्रवृत्त केले. अखेर खाजगी इसम शांताराम पादीर याच्यामार्फत ग्रामसेवकासाठी ४८ हजारांची लाच पंचांसमक्ष स्वीकारण्यात आल्याचे एसीबीने स्पष्ट केले आहे. याप्रकरणी घोटी पोलीस ठाण्यात भ्रष्टाचार प्रतिबंधक अधिनियम १९८८ च्या कलम ७, ७ (अ) व १२ अन्वये गुन्हा दाखल करण्याची प्रक्रिया सुरू आहे. सदर यशस्वी कारवाई लाचलुचपत प्रतिबंधक विभागाचे पोलीस अधीक्षक व अप्पर पोलीस अधीक्षक यांच्या मार्गदर्शनाखाली, पोलीस निरीक्षक अजय सूर्यवंशी आणि पोलीस निरीक्षक योगेश शिंदे यांच्या नेतृत्वात पार पडली. या पथकात सहायक पोलीस उपनिरीक्षक पंकज पळशीकर व पोलीस हवालदार प्रमोद चव्हाणके यांनी सहभाग घेतला तर कारवाईस पोलीस उपअधीक्षक एकनाथ पाटील यांचे मार्गदर्शन लाभले. लाचलुचपत प्रतिबंधक विभागाने नागरिकांना आवाहन केले आहे की, शासकीय कामांसाठी कोणत्याही लोकसेवकाने किंवा त्यांच्या प्रतिनिधीने लाचेची मागणी केल्यास तात्काळ एसीबीच्या टोल फ्री क्रमांकावर किंवा विभागाशी संपर्क साधून तक्रार नोंदवावी.