इगतपुरीनामा न्यूज – इगतपुरी तालुक्यातील पिंप्री सदो शिवारात अलीकडेच आलेल्या पुराच्या तडाख्यात सापडलेल्या ३ आदिवासी कुटुंबांतील १६ जणांना प्रशासनाच्या वतीने यशस्वी रेस्क्यू करून सुखरूप बाहेर काढण्यात आले होते. या संकटातून बचावलेल्या कुटुंबांना आधार देण्यासाठी अखिल भारतीय आदिवासी विकास परिषदेचे राष्ट्रीय युवा अध्यक्ष तथा काँग्रेस नेते लकीभाऊ जाधव पुढे आले. “आपण समाजाचे काहीतरी देणे लागतो” या भावनेतून आज त्यांनी पूरग्रस्त कुटुंबांची प्रत्यक्ष भेट घेतली. यावेळी त्यांनी या कुटुंबांची आस्थेने विचारपूस करत धीर दिला आणि त्यांना ब्लँकेट तसेच जीवनावश्यक वस्तूंच्या साहित्याचे वाटप केले. संकटाच्या काळात मिळालेल्या या मदतीमुळे या आदिवासी कुटुंबांना मोठा आधार मिळाला आहे. इगतपुरीचे नगरसेवक भूषण जाधव म्हणाले की इगतपुरी तालुक्यात ठिकठिकाणी पावसाचा फटका आदिवासी बांधवांना बसला आहे. मात्र आदिवासी नेते लकीभाऊ जाधव त्यांच्या टीमसोबत अखंड मदतीला धावत आहेत. काँग्रेस नेते आकाश पारख म्हणाले की, पांडुरंग परमात्मा माणसातच असल्याचे सिद्ध करीत लकीभाऊ जाधव यांनी मदतीचा हात पुढे करून आषाढी एकादशी साजरी केली. यावेळी सामाजिक कार्यकर्ते प्रथमेश गोडे, प्रशांत चंद्रमोरे, सिद्धांत पारख, तनिष्क परदेशी, तुषार तावडे, सामाजिक कार्यकर्त्या नीता वारघडे आदी उपस्थित होते.
