इगतपुरीनामा न्यूज – मुंबई नाशिक महामार्गावर सुरू असलेल्या रस्त्याच्या कामादरम्यान आणि मुसळधार पावसामुळे गोंदे दुमाला फाट्याजवळ एका दुचाकीस्वाराचा मोठा अपघात थोडक्यात टळला. पावसामुळे रस्त्याचा अंदाज न आल्याने संबंधित दुचाकीस्वाराची गाडी चिखलात आणि गाळात अडकली. पुढे जाता येत नसल्याने हा दुचाकीस्वार गंभीर अडचणीत सापडला होता. घटनास्थळी अनेक नागरिक उपस्थित होते आणि काहीजण या सर्व प्रसंगाचे मोबाईलवर चित्रीकरण करत होते. परंतु मदतीसाठी कोणीही पुढे येत नसल्याचे चित्र पाहायला मिळाले. याच दरम्यानघोटी महामार्ग पोलीस मदत केंद्राचे पोलीस अंमलदार शेवरे आणि धनगर यांचे या प्रकाराकडे लक्ष गेले. त्यांनी कोणताही वेळ न घालवता आपले बूट व पॅन्ट वर करून थेट चिखलात प्रवेश केला. आपल्या जीवाची पर्वा न करता त्यांनी अथक प्रयत्नांनंतर अडकलेल्या दुचाकीस्वाराला आणि त्याच्या दुचाकीला सुखरूपपणे बाहेर काढले. महामार्ग पोलिसांच्या या तत्पर आणि धाडसी कृतीमुळे एका नागरिकाचा जीव वाचला असून त्यांनी केवळ आपले कर्तव्यच पार पाडले नाही, तर संकटात सापडलेल्या व्यक्तीला वेळेवर मदत करून उत्तम माणुसकीचे दर्शन घडवले आहे. त्यांच्या या कार्याचे परिसरात सर्वत्र कौतुक होत असून सोशल मीडियावरही त्यांच्यावर कौतुकाचा वर्षाव होत आहे. सध्या मुंबई नाशिक महामार्गावर अनेक ठिकाणी रस्त्याची कामे सुरू आहेत. त्यातच सततच्या पावसामुळे काही भागांत चिखल आणि घसरडी परिस्थिती निर्माण झाली आहे. त्यामुळे प्रवास करताना वाहनचालकांनी विशेष खबरदारी बाळगावी आणि सुरक्षितपणे वाहन चालवावे असे आवाहन प्रशासनाकडून करण्यात येत आहे. व्हिडीओ बातमी पहा https://youtube.com/shorts/d3564RNcRUk?si=4qXIRv3bULLGM8_f
