इगतपुरीनामा न्यूज – ग्रामीण भागातील विद्यार्थ्यांना शिक्षणासाठी आवश्यक सुविधा उपलब्ध करून देण्याच्या उद्देशाने इनर व्हील क्लब ऑफ बॉम्बे नॉर्थ यांच्या वतीने इगतपुरी तालुक्यातील ३ जिल्हा परिषद शाळांमध्ये ‘रूरल एज्युकेशन सपोर्ट’ हा विशेष उपक्रम राबविण्यात आला. या उपक्रमातून २०० हून अधिक विद्यार्थ्यांना शैक्षणिक साहित्य व विविध जीवनावश्यक वस्तूंचे वाटप करण्यात आले. वाघ्याचीवाडी येथील जिल्हा परिषद शाळेतील ५५ विद्यार्थ्यांना, तर आवळखेड येथील जिल्हा परिषद शाळेतील ९५ विद्यार्थ्यांना पुस्तके, वह्या, स्टेशनरी, शालेय बूट आणि रेनकोटचे वितरण करण्यात आले. तसेच सर्व विद्यार्थी आणि उपस्थितांसाठी फरिदा कापाडिया यांच्या सौजन्याने दुपारच्या पौष्टिक भोजनाची व्यवस्था करण्यात आली. क्लबच्या अध्यक्षा जयश्री लखोटिया यांनी विद्यार्थ्यांना फ्रुटी, चिक्की, फरसाण आणि चॉकलेटचे वाटप केले. शाळेतील शिक्षक व कर्मचाऱ्यांना संस्थेच्या लोगोयुक्त छत्र्या भेट देण्यात आल्या. भगतवाडी येथील जिल्हा परिषद शाळेतील विद्यार्थ्यांनाही अल्पोपहाराचे वाटप करून त्यांच्यात आनंदाचे वातावरण निर्माण करण्यात आले. हा उपक्रम क्लबच्या अध्यक्षा जयश्री लखोटिया यांच्या नेतृत्वाखाली सचिव डॉ. विद्या मुकुंद, प्रकल्प प्रमुख प्रगती अजमेरा, माजी अध्यक्षा वीणा ठाकर, रुपा सेन, डॉ. इस्मत गबुला, फरिदा कापाडिया, उर्विजा संघवी आणि साधना दोशी यांच्या सहकार्याने यशस्वीरीत्या पार पडला. ग्रामीण विद्यार्थ्यांना आवश्यक शैक्षणिक साहित्य उपलब्ध करून देतानाच त्यांच्यात शिक्षणाबद्दल आत्मविश्वास, प्रेरणा आणि जिद्द निर्माण करण्याचा या उपक्रमामागील मुख्य उद्देश असल्याचे आयोजकांनी सांगितले. या स्तुत्य सामाजिक उपक्रमाचे ग्रामस्थ, शिक्षक व पालकांनी कौतुक केले.
