इगतपुरीनामा न्यूज – इगतपुरी तालुक्यातील लष्कराच्या ७/१२ वरील इतर हक्कातील नोंदी रद्द करण्यासाठी महसूल मंत्री चंद्रशेखर बावनकुळे यांच्याकडे मंत्रालयात इगतपुरीचे आमदार हिरामण खोसकर, माजी आमदार जयंत जाधव, ॲड. संदीप गुळवे यांच्या मार्गदर्शनाखाली मंगळवारी बैठक पार पडली. इगतपुरी तालुक्यातील बेलगाव कुऱ्हे, नांदूरवैद्य, नांदगाव बुद्रुक, साकुर, घोटी खुर्द, समनेरे, मालुंजे, धामणगाव, बेलगाव तऱ्हाळे, अडसरे, अधरवड, टाकेद बुद्रुक, टाकेद खुर्द, सोनोशी, बारशिंगवे गावांअंतर्गत येणारे सर्व महसुली वाडी-पाडे इत्यादी गावांतील शेतकऱ्यांच्या हजारो एकर सातबाऱ्यावरील इतर हक्कात लष्करी सरावासाठी “This (Sector is Notified for Field Firing and Artillery Practice) नोंद होणार होती. असा आदेश लष्करी अधिकाऱ्यांनी निर्गमित केल्याने तालुक्यातील शेतकऱ्यांनी महसूल मंत्र्यांची शेतकऱ्यांनी भेट घेतली. महसूल मंत्री ना. चंद्रशेखर बावनकुळे यांनी त्वरित नाशिकचे जिल्हाधिकारी आयुष प्रसाद यांच्याशी संपर्क साधून अतिशय महत्वाची बाब म्हणून त्वरित कार्यवाही करण्याचे आदेश देत ७/१२ उताऱ्यावर इतर अधिकारात कोणतीही महसूली नोंद न करण्याचे निर्देश दिले. आवश्यक वाटल्यास शासनाकडे प्रस्ताव पाठविण्याची सूचना केली. याबद्धल माजी जिल्हा परिषद सदस्य सुनिल वाजे, खरेदी विक्री संघाचे संचालक समाधान वारूंगसे, भाजपा तालुकाध्यक्ष भाऊसाहेब कडभाने, पांडुरंग गाढवे, आत्माराम फोकणे, तुकाराम सहाणे, राहुल वारूंगसे, गणेश फोकणे, गोरख वाजे, नागेश गायकर यांनी आभार मानले.
