इगतपुरीनामा न्यूज – घोटी पोलीस ठाण्यात गु. र. नं १३/२०२६ भारतीय न्याय संहिता ३०९(६), ३५१(२), ३(५) हा दरोडा व जबरी चोरीचा गुन्हा १५ जानेवारीला दाखल आहे. या दाखल गुन्ह्याचा तपास करत असताना गोपनीय माहितीच्या आधारे संशयित आरोपी १) इम्रान अब्दुल हकीम शेख, २) गौरव निवृत्ती भोर, ३) अमर बालाजी धावरे व ४) साहिल हरिश्चंद्र तुपे, ५) युनिस खान सर्व रा. घोटी, ता. इगतपुरी, जि. नाशिक आदींनी हा गुन्हा केल्याचे निष्पन्न झाले. त्यांचा शोध घेतला असता ते सर्व घोटी पोलीस ठाणे परिसरात मिळून आले. त्यांच्याकडे सखोल चौकशी केली असता त्यांनी हा गुन्हा केल्याची कबुली दिली आहे. ह्या आरोपींनी फिर्यादी कलीममुल्ला अन्सारउल्ला चौधरी, वय ३२, व्यवसाय भंगार फेरी, रा. अंबड नाशिक अडवत शिवीगाळ आणि दमदाटी केली. त्यांच्या डोक्यात हातावर कोयत्याने व दगडाने पाठीवर मारहाण केली. त्याच्याकडील रोख २२ हजार रुपये व १० हजाराचा मोबाईल हिसकावुन घेतला होता. आरोपींच्या ताब्यातून गुन्ह्यात वापरलेल्या २ मोटरसायकली, ४ मोबाईल, गुन्ह्यात वापरलेले हत्यार कोयता, रोख रक्कम हस्तगत करण्यात आली आहे. ही कामगिरी नाशिक ग्रामीणचे पोलीस अधीक्षक डी. एस. स्वामी यांच्या आदेशान्वये व अपर पोलीस अधीक्षक आदित्य मिरखेलकर यांच्या सूचनांप्रमाणे स्थानिक गुन्हा शाखेचे पोलीस निरीक्षक दत्तात्रय शिंदे यांच्या मार्गदर्शनाखाली पोलीस उपनिरीक्षक सुदर्शन बोडके, पोलीस हवालदार प्रविण काकड, संदीप नागपुरे, संतोष दोंदे, नवनाथ शिरोळे या पथकाने केली आहे. पोलीस अधीक्षक डी. एस. स्वामी यांनी या दमदार कामगिरीचे कौतुक केले आहे.
