इगतपुरीनामा न्यूज – नातेवाईकांनी तुझ्यावर करणी केली असून तुला बाधा झाली आहे. तुला बरे करण्यासाठी पूजाविधी केली नाही तर तुझे बरेवाईट होईल. अशी भीती घालून पूजाविधी आणि त्याच्या नावाखाली इगतपुरी शहरातील तळेगाव येथील २ महिलांनी ५५ हजार रुपये उकळले. पूजा करून आणि रत्न खडे यांमधून कोणताही फरक पडला नसल्याने माझे पैसे वापस द्यावेत असे फिर्यादी महिलेने त्या दोघींना फोनवर सांगितले. मात्र फिर्यादी महिलेला शिवीगाळ करून मारून टाकण्याची धमकी देण्यात आली. तु कोणत्याही भक्तांकडे जा तुला कोणीही निट करणार नाही. माझे नादी लागली तर तुझे पूर्ण शरीर सडवून टाकील अशी धमकी देण्यात आली. म्हणून वंदना रवींद्र गोसावी वय ४० रा. दत्त नगर गिरणारे यांनी इगतपुरी पोलीस ठाण्यात फिर्याद दाखल केली आहे. या फिर्यादीनुसार इगतपुरी पोलिसांनी तळेगाव येथील वैशाली किशोर बैरागी, रत्ना माळी रा. तळेगाव, ता. इगतपुरी, जि. नाशिक या दोघींवर गुन्हा दाखल केला आहे. भारतीय न्याय संहिता कलम ३१८, ३५१ (२), ३५२, ३ (५) आणि महाराष्ट्र अंधश्रद्धा निर्मूलन कायदा २०१३ चे कलम ४ प्रमाणे गुन्हा दाखल करून कसून तपास सुरु करण्यात आला आहे. महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंधक कायदा २०१३ च्या कलम ४ नुसार, कोणत्याही व्यक्तीला जादूटोणा किंवा अघोरी कृत्य करण्याचा, भोंदूगिरीद्वारे चमत्कार दाखवण्याचा किंवा नरबळीसारखे जीवघेणे प्रकार करण्याचा अधिकार नाही. असे कृत्य केल्यास ३ ते ७ वर्षांपर्यंत कारावास आणि आर्थिक दंडाची तरतूद आहे.
