इगतपुरीनामा न्यूज – इगतपुरी तालुक्यातील एका गावात राहणाऱ्या अल्पवयीन मुलीला अज्ञात व्यक्तीने फूस लावून पळवून नेल्याची धक्कादायक घटना २३ मार्चला उघडकीस आली आहे. याबाबत इगतपुरी पोलीस ठाण्यात अज्ञात व्यक्तीविरोधात अपहरणाचा गुन्हा दाखल करण्यात आला. दरम्यान इगतपुरी तालुक्यात या प्रकारच्या घटना वाढतच चालल्या असल्याने चिंता वाढली आहे. अधिक माहिती अशी की, इगतपुरी तालुक्यातील एका गावात अल्पवयीन मुलगी आपल्या कुटुंबियांसह वास्तव्याला आहे. सोमवारी २३ मार्चला पिडीत मुलीला अज्ञात व्यक्तीने काहीतरी आमिष दाखवून फूस लावून पळवून नेले. हा प्रकार समोर आल्यानंतर तिच्या नातेवाईकांनी तिचा सर्वत्र शोध घेतला. मात्र कोणतीही माहिती मिळाली नाही. अखेर तिच्या पालकांनी इगतपुरी पोलीस ठाण्यात धाव घेवून फिर्याद दिली. त्यानुसार अज्ञात व्यक्तीविरोधात अपहरणाचा गुन्हा दाखल करण्यात आला आहे. पुढील तपास पोलीस निरीक्षक सारिका अहिरराव ह्या करीत आहेत.
