इगतपुरीनामा न्यूज – इगतपुरी बस आगार अंतर्गत धावणाऱ्या बसमधील एका बस वाहकाने ग्रामीण महिला प्रवाशाशी अवमानकारक व अश्लील भाषेत बोलल्याचा गंभीर प्रकार उघडकीस आला आहे. या घटनेमुळे महिलांच्या सुरक्षिततेचा आणि सन्मानाचा प्रश्न पुन्हा एकदा ऐरणीवर आला असून, आगार व्यवस्थापकांच्या कर्तव्याबाबतही प्रश्नचिन्ह उपस्थित होत आहे. आज गुरुवारी ५ फेब्रुवारीला सायंकाळी इगतपुरी आगाराच्या बसमधून प्रवास करणाऱ्या एका महिला प्रवाशाशी संबंधित बस वाहकाने “बस तुमच्या घरात आणायची का” अशा स्वरूपाची घाणेरडी व अपमानास्पद भाषा वापरल्याचा आरोप महिलेने आहे. या घटनेच्या वेळी बसमध्ये इतर महिला प्रवासीही उपस्थित होत्या. राज्य शासन एकीकडे महिलांच्या सन्मानासाठी आणि सुरक्षिततेसाठी विविध योजना व उपक्रम राबवत असताना, इगतपुरी आगारातील बस वाहकांकडून अशा प्रकारचे वर्तन होणे ही बाब अत्यंत चिंताजनक आहे. यावरून इगतपुरी आगार व्यवस्थापकांचे कर्मचारी नियंत्रण पूर्णपणे ढासळले असून, बस वाहकांवर कोणताही प्रशासकीय धाक राहिलेला नाही, अशी तीव्र चर्चा प्रवासी वर्गात सुरू आहे. ह्या प्रकरणी संबंधित महिला प्रवाशाने आगार व्यवस्थापकांकडे लेखी तक्रार दाखल केली असून, संबंधित बस वाहकावर तात्काळ शिस्तभंगाची कारवाई करण्याची मागणी करण्यात आली आहे. मात्र, आगार प्रशासनाने वेळीच कठोर भूमिका घेतली नाही, तर हे प्रकार आणखी वाढण्याची शक्यता नाकारता येत नाही. महिला प्रवाशांच्या सुरक्षिततेची जबाबदारी असलेल्या इगतपुरी आगार व्यवस्थापकांनी या प्रकरणाची गंभीर दखल घेऊन दोषी बस वाहकावर कठोर कारवाई करावी, अन्यथा महामंडळाच्या प्रतिमेला मोठा धक्का बसू शकतो, अशी संतप्त प्रतिक्रिया प्रवासी वर्गातून व्यक्त होत आहे.