इगतपुरीनामा न्यूज – नाशिक ग्रामीण जिल्ह्यातील अवैध व्यवसायांचे समुळ उच्चाटन व गुन्हेगारी कारवायांना प्रतिबंध होण्यासाठी, कायदा व सुव्यवस्था अबाधित राखण्यासाठी पोलीस अधीक्षक बाळासाहेब पाटील यांच्या आदेशान्वये पोलीस ठाणेनिहाय कारवाई करण्यात येत आहे. त्या अनुषंगाने अपर पोलीस अधीक्षक नाशिक ग्रामीण आदित्य मिरखेलकर यांना मिळालेल्या गुप्त बातमीप्रमाणे वाडीवऱ्हे पोलीस ठाणे हद्दीत सारूळ शिवारात अवैधरित्या जिलेटीनचा साठा जप्त करून पोलीस पथकाने कारवाई केली आहे. सोमवारी वाडीवऱ्हे पोलीस ठाणे हद्दीत सारूळ शिवारात घरामध्ये आणि पत्र्याचे शेडमध्ये अवैधरित्या जिलेटीन सारख्या स्फोटक पदार्थांचा साठा असल्याची गोपनीय माहिती अपर पोलीस अधीक्षक आदित्य मिरखेलकर यांना मिळाली होती. त्यानुसार वाडीवऱ्हे पोलीस स्टेशनचे पोलीस निरीक्षक भगवान मथुरे व पोलीस अधीक्षक कार्यालयाचे सहाय्यक पोलीस निरीक्षक दिनकर मुंडे यांच्या पथकाने लागलीच नाशिक ग्रामीण श्वान पथक, बॉम्ब शोधक व नाशक पथक यांचेसह या ठिकाणी पंचासमक्ष छापा टाकला. ह्या ठिकाणी सारूळच्या शिवारात नमुद संशयितांच्या राहते घराच्या पाठीमागील बाजूला तरोच पत्र्याचे शेडमध्ये अमोनियम नायट्रेट युक्त असलेल्या जिलेटीन सारखे स्फोटक पदार्थांच्या कांड्या भरलेले बॉक्स आणि डेटोनेटर एकत्रितरित्या निष्काळजीपणे मिळून आले.
गोरख बाजीराव ढगे, वय ३४, विकास नवले, ओंकार कैलास नवले, वय २३, सर्व रा. सारूळ, ता. जि. नाशिक दिपक दशरथ क्षिरसागर, वय ३२, रा. शिंगवे बाहुला, देवळाली कॅम्प, गौरव मोहन नवले, वय ३२, रा. सारूळ, अमित अजमेरा, (पुर्ण नाव माहित नाही), कोठावदे (पुर्ण नाव माहित नाही) असे ह्या घटनेतील आरोपींची नावे आहेत. आरोपी क्र. १ ते ५ यांना जिलेटीन सारख्या स्फोटक पदार्थांच्या कांडया भरलेले बॉक्स यांच्या संपर्कात डेटोनेट र आल्यास भयंकर विस्फोट होऊन इतरांचे जीवित किंवा व्यक्तिगत सुरक्षा धोक्यात येईल किंवा कोणत्याही व्यक्तीस दुखापत किंवा क्षति पोहचु शकते. हे माहित असतांनाही अमोनियम नायट्रेट युक्त असलेल्या जिलेटीनच्या कांड्या भरलेले बॉक्स आणि डेटोनेटर एकत्रितरित्या निष्काळजीपणाने ठेवलेले सदरची स्फोटके घरात व शेडमध्ये ठेवण्याचा त्यांच्याकडे कोणताही अधिकृत परवाना नाही. हे माहित असतांनाही त्यांनी अमोनियम नायट्रेट युक्त असलेल्या जिलेटीनच्या कांड्या भरलेले बॉक्स आणि डेटोनेटर, डी.एफ. वायर असे एकत्रितरित्या निष्काळजीपणाने कब्जात बाळगतांना मिळुन आले. यातील आरोपी क्र. ६ व ७ यांना मुद्देमाल सुरक्षितरित्या हाताळणाऱ्या प्रशिक्षित इसमाने काम झाल्यानंतर उर्वरित स्फोटके हे मॅग्झिनमध्ये सुरक्षितरित्या ठेवणे बंधनकारक असते. हे माहित असतांना देखील नमुद मुद्देमाल यातील आरोपी क्र. १ ते ५ यांच्या ताब्यात असुरक्षितरित्या ठेवला म्हणुन ह्या संशयित वाडीवऱ्हे पोलीस ठाण्यात गुन्हा दाखल करण्यात आला आहे. ताब्यात घेतलेल्या आरोपींच्या कब्जातून विनापरवाना असुरक्षितरित्या कब्जात बाळगलेले अमोनियम नायट्रेट युक्त असलेल्या जिलेटीनच्या कांड्या भरलेले ४९ बॉक्स त्यात एकूण ६,१२५ जिलेटीनच्या कांड्या, २२०० इलेक्ट्रीक डेटोनेटर, १५० मीटर डी. एफ. वायर असा एकुण ९५ हजार ७५० किंमतीचा साठा मिळुन आला आहे. संशयित आरोपींना वाडीवऱ्हे पोलीस ठाण्यात दाखल गुन्ह्यात अटक करण्यात आली असून पुढील तपास पोलीस निरीक्षक भगवान मथुरे यांचे पथक करीत आहे. पोलीस अधीक्षक बाळासाहेब पाटील, अपर पोलीस अधीक्षक आदित्य मिरखेलकर यांचे मार्गदर्शन व सुचनांप्रमाणे वाडीवऱ्हेचे पोलीस निरीक्षक भगवान मथुरे, पोलीस अधीक्षक कार्यालयाकडील सहाय्यक पोलीस निरीक्षक दिनकर मुंडे, पोलीस उपनिरीक्षक अमोल सुर्यवंशी नाशिक तालुका पोलीस उपनिरीक्षक एकनाथ भोईर, वाडीवऱ्हे पोलीस उपनिरीक्षक सुनिल शिंदे, पोलीस अंमलदार सुभाष धुळे, रावसाहेब शिंदे, जालिंदर खराटे, सचिन पिंगळ, सचिन कदम, तुषार कापडणीस, रविराज जगताप यांच्या पथकाने ही कारवाई केली आहे.
