
इगतपुरीनामा न्यूज – इगतपुरी तालुक्यातील देवगाव शिवारात खोडाळा रोडवर घडलेल्या कार अडवून दरोडा टाकण्याच्या गुन्ह्याचा घोटी पोलीस स्टेशन आणि स्थानिक गुन्हे शाखेच्या पथकाने अवघ्या ७२ तासांत उलगडा केला आहे. याप्रकरणी २ आरोपींना अटक करण्यात आली असून गुन्ह्यात वापरलेली कार जप्त करण्यात आली आहे. उर्वरित आरोपींचा शोध सुरू आहे. १७ नोव्हेंबरला मध्यरात्री सुमारे १२.१० वाजण्याच्या सुमारास खोडाळा रोड, देवगाव शिवार, ता. इगतपुरी, जि. नाशिक येथे ही घटना घडली. आरोपींनी फिर्यादीच्या कारचा पाठलाग करून त्यांची गाडी आडवी लावली. त्यानंतर त्यातील तीन इसमांनी खाली उतरून फिर्यादी व साक्षीदार यांना चाकूचा धाक दाखवला. त्यांच्याकडील सोन्याचे दागिने, रोख रक्कम, एटीएम कार्ड आणि ड्रायव्हिंग लायसन्स बळजबरीने हिसकावून घेत आरोपी कारसह पसार झाले होते. याप्रकरणी घोटी पोलीस ठाण्यात गु.र.नं. ४०३/२०२६ अन्वये भारतीय न्याय संहिता कलम ३०९(४), ३(५) प्रमाणे गुन्हा दाखल करण्यात आला होता. या घटनेत १ लाख ७४ हजार रुपये किमतीचा मुद्देमाल चोरीला गेला होता. त्याचे सोन्याची चेन (२ तोळे): अंदाजे किंमत ८० हजार रुपये, कानातील सोन्याचे टॉप्स (५ ग्रॅम): अंदाजे किंमत २० हजार रुपये, मंगळसूत्र (८ ग्रॅम): अंदाजे किंमत ३२ हजार रुपये, सोन्याची अंगठी (५ ग्रॅम): अंदाजे किंमत २० हजार रुपये, सोन्याची अंगठी (५ ग्रॅम): अंदाजे किंमत २० हजार रुपये, रोख २ हजार रुपये, एटीएम कार्ड व ड्रायव्हिंग लायसन्स यांचा समावेश होता.
सखोल व तांत्रिक तपासाच्या आधारे पोलिसांनी काशिनाथ हरी खोडे, वय २९, संजय धोंडीराम भांगरे, वय ३०, दोघे रा. भिलमाळ, ता. त्र्यंबकेश्वर, जि. नाशिक या २ आरोपींना ताब्यात घेऊन अटक केली आहे. दोन्ही आरोपींनी गुन्ह्याची कबुली दिली असून गुन्ह्यात वापरलेले MH 15 KC 2337 क्रमांकाचे वाहन जप्त करण्यात आले आहे. फरार असलेल्या इतर आरोपींचा शोध पथकाकडून सुरू आहे. नाशिक ग्रामीण पोलीस अधीक्षक डॉ. डी. एस. स्वामी, अप्पर पोलीस अधीक्षक विमला एम. आणि उपविभागीय पोलीस अधिकारी संजय बांबळे यांच्या मार्गदर्शनाखाली घोटीचे वरिष्ठ पोलीस निरीक्षक विजय शिंदे व स्थानिक गुन्हे शाखा पोलीस निरीक्षक राहुल मोरे यांच्या नेतृत्वाखाली पथकाने कामगिरी बजावली. तपास पथकात पोउपनि प्रतीक भिंगारदे, मपोउपनि नेहे, पोलीस अंमलदार संदीप नागपुरे, प्रवीण काकड, राम धकाते, श्रीराम खैरे, नवनाथ शिरोळे, प्रकाश कासार, सचिन गवळी, संतोष नागरे, श्रीकृष्ण यंदे, सनी भवर, तुषार मरसाळे, अनिकेत मोरे, तांत्रिक विश्लेषण शाखेचे हेमंत गिलबिले, प्रदीप बहिरम आणि मपोअ कोजागिरी बच्छाव, वैशाली डावरे यांचा समावेश होता. पथकाने कामाची विभागणी व समन्वय साधत अल्प काळात गुन्हा उघडकीस आणल्याबद्दल नागरिकांमधून समाधान व कौतुक व्यक्त होत आहे.