इगतपुरीनामा न्यूज – शेतीविषयीची अनास्था कमी करून शेती आणि शेतकऱ्यांना नवी प्रेरणा देण्याचे काम कृषी विज्ञान सेवा पुरस्कार करतील, असा विश्वास इगतपुरीचे आमदार हिरामण खोसकर यांनी व्यक्त केला. संगमनेर तालुक्यातील सोनोशी येथे कारभारी दादा शिवार प्रतिष्ठानच्या वतीने आयोजित कृषी विज्ञान सेवा पुरस्कार वितरण समारंभात ते बोलत होते. यावेळी आमदार हिरामण खोसकर म्हणाले की, नाशिक विभागाचे जलसंधारण अधीक्षक अभियंता हरिभाऊ गिते, संरक्षण विभागातील शास्त्रज्ञ डॉ. एल. के. गिते, प्रगतशील शेतकरी भाऊसाहेब गिते यांनी आपल्या शेतीशी असलेली नाळ कधीही तुटू दिली नाही. शासकीय नोकरीच्या व्यापातूनही त्यांनी प्रतिष्ठानच्या माध्यमातून शेती, शेतकरी आणि कृषी क्षेत्रासाठी सुरू ठेवलेले कार्य निश्चितच कौतुकास्पद आहे. त्यांचे हे काम इतर नोकरदारांसाठी प्रेरणादायी असून, समाजाप्रती असलेली बांधिलकी अधोरेखित करणारे आहे. या कार्यक्रमात डॉ. एल. के. गिते लिखित ‘मातीचा धनी – गोष्ट एका धाडसी बापाची’ या पुस्तकाचे प्रकाशन आमदार सत्यजित तांबे यांच्या हस्ते करण्यात आले. या पुस्तकातून एका कष्टाळू, जिद्दी आणि धाडसी शेतकरी पित्याचा जीवनप्रवास उलगडण्यात आला आहे.
शेतकरी, कृषी शास्त्रज्ञ आणि कृषीपूरक सेवा अशा तीन विभागांत दरवर्षी हे पुरस्कार प्रदान केले जातात. यंदा शेतकरी विभागातून विठ्ठल बाळाजी ढेरंगे, बद्रिनाथ इंदापुरे आणि प्रमिला फंड यांना, शास्त्रज्ञ विभागातून डॉ. किशोर शिंदे आणि प्रा. तुषार उगले यांना, तर कृषीपूरक सेवा विभागातून नर्सरी व्यावसायिक विरेंद्र थोरात, कृषीविषयक जनजागृती करणाऱ्या यूट्यूबर पल्लवी बोंगे इंगोले आणि हवामानतज्ज्ञ दीपक जाधव यांना कृषी विज्ञान सेवा पुरस्काराने गौरविण्यात आले. सुप्रसिद्ध व्याख्याते नितीन चंदनशिवे यांचे ‘शेती, युवक आणि कुटुंब’ या विषयावरील अंतर्मुख करायला लावणारे व्याख्यान झाले. शेती, कुटुंबव्यवस्था, तरुणाई आणि सामाजिक जबाबदारी यांचा परस्परसंबंध त्यांनी प्रभावीपणे मांडला. या कार्यक्रमास कारभारी दादा शिवार प्रतिष्ठानचे पदाधिकारी शिवराम सांगळे, बाळासाहेब फड, नितीन सांगळे यांच्यासह संगमनेर, सिन्नर तालुक्यांतील शेतकरी, महिला, कामगार, विविध क्षेत्रांतील मान्यवर मोठ्या संख्येने उपस्थित होते. शेतीशी निष्ठा जपणाऱ्या व्यक्तींच्या कार्याचा गौरव आणि नव्या पिढीला कृषी क्षेत्राकडे प्रेरित करण्याचा प्रतिष्ठानचा हा उपक्रम उपस्थितांच्या विशेष कौतुकाचा विषय ठरला.
