इगतपुरीनामा न्यूज – टिटोली येथील जिल्हा परिषद सेमी इंग्रजी प्राथमिक आदर्श शाळेच्या व्यवस्थापन समितीची निवड प्रक्रिया उत्साहपूर्ण व आनंददायी वातावरणात पार पडली. समितीतील सर्व सदस्यपदांवर महिलांची निवड झाल्याने महिला सक्षमीकरणाचा एक प्रेरणादायी अध्याय सुरू झाला आहे. आपल्या मुलांच्या शिक्षणाबरोबरच त्यांच्या संस्कारांची, सुरक्षिततेची आणि उज्ज्वल भवितव्याची काळजी घेणाऱ्या मातांनी आता शाळेच्या विकासाची जबाबदारीही खंबीरपणे स्वीकारली आहे. त्यामुळे ही निवड केवळ समितीची निवड न राहता मातृशक्तीच्या विश्वासाचा आणि शाळेच्या विकासासाठीच्या सामूहिक बांधिलकीचा उत्सव ठरली आहे. शाळेची शैक्षणिक गुणवत्ता वाढविणे, विद्यार्थ्यांच्या सर्वांगीण विकासासाठी विविध उपक्रम राबविणे, शाळेतील स्वच्छता व सुरक्षितता, विद्यार्थ्यांना आनंददायी शैक्षणिक वातावरण उपलब्ध करून देणे तसेच पालकांचा शाळेशी असलेला संवाद अधिक दृढ करणे, यासाठी नवनिर्वाचित समिती प्रयत्नशील राहणार आहे. “मुलांच्या भविष्यासाठी आई नेहमीच पुढे असते; आता त्याच मायेच्या हातांनी शाळेच्या भवितव्याची धुरा स्वीकारली आहे,”अशी भावना शाळा व्यवस्थापन समितीचे माजी अध्यक्ष अनिल भोपे यांनी व्यक्त केली. महिलांच्या या उत्स्फूर्त सहभागामुळे टिटोली शाळेच्या विकासाला नवी दिशा आणि नवे बळ मिळणार असा विश्वास पालक, शिक्षक व ग्रामस्थांनी व्यक्त केला. सर्व नवनिर्वाचित महिला सदस्यांचे शाळेच्या वतीने अभिनंदन व सत्कार करून पुढील कार्यासाठी पालक व ग्रामस्थांनी शुभेच्छा दिल्या. निवडीवेळी मुख्याध्यापक मंगला गायकवाड, माजी अध्यक्ष अनिल भोपे यांच्यासह शाळेचे सर्व शिक्षकवृंद उपस्थित होते.