इगतपुरी तालुक्याच्या राजकारणातील “कॉम्प्युटर” म्हणून परिचित असणारे घोटी कृषी उत्पन्न बाजार समितीचे कार्य कुशल संचालक सुनील भाऊ जाधव यांचा आज २२ सप्टेंबर रोजी वाढदिवस!त्यानिमित्ताने त्यांच्या प्रेरणादायी राजकीय व सामाजिक प्रवासाचा हा थोडक्यात आढावा… राजकारणात येण्यासाठी कोणतीही राजकीय पार्श्वभूमी नसली, आर्थिक परिस्थिती प्रतिकूल असली आणि शिक्षण अगदी मर्यादित असलं, तरीही एखादा माणूस आपल्या अफाट बुद्धीच्या जोरावर राजकारणात कसे यश मिळवू शकतो, याचे उत्तम उदाहरण म्हणजे सुनील भाऊ जाधव यांचे नाव अग्रक्रमाने घ्यावे लागेल ! सुरवातीच्या काळात त्यांचे राजकारण हे मुख्य क्षेत्र नसले तरी लोकनेते स्व. लोकनेते गोपाळराव ( दादासाहेब ) गुळवे यांच्या सहवासात आल्यानंतर ते समाजकारण आणि राजकारणाचा अविभाज्य भाग बनले. बोलण्यातली प्रभावी शैली, भारदस्त आवाज, चाणाक्ष नजर, अचूक राजकीय डावपेच आणि माणसे जोडण्याची अजब कला यामुळे ते जनमानसात कमालीचे लोकप्रिय झाले. संगणकासारखी त्यांची स्मरणशक्ती असून हजारो लोकांचे मोबाईल क्रमांक आणि संपर्क अचूकपणे पाठ आहेत. गेल्या ३० वर्षांपासून ते राजकारणात सातत्याने दीर्घाकाळ यशस्वी आहेत. स्व. गोपाळराव गुळवे आणि माजी आमदार शिवराम झोले यांची मर्जी कायम राखत त्यांनी विविध संस्थांमध्ये आपले नेतृत्व खऱ्या अर्थाने सिद्ध करून दाखवले. ते सध्या इगतपुरी तालुका खरेदी विक्री संघाचे चेअरमन, बाजार समितीचे सलग अनेकदा संचालक आणि घोटी विविध कार्यकारी सहकारी सोसायटीचे चेअरमन अशा महत्त्वाच्या पदांवर कार्यरत असून आजही या तिन्ही संस्थांचे यशस्वी प्रतिनिधित्व करत आहेत. देह झाला पंढरी अन श्वास हे जपमाळ झाले.. रंगता भजनी विठुच्या हात माझे टाळ झाले… सुनील भाऊ जाधव हे केवळ राजकारणातच नव्हे, तर वारकरी संप्रदायातही तितकेच सक्रिय आहेत. गळ्यात तुळशीच्या माळा, कपाळावर गंध-बुक्का, सतत मुखात अभंग, भजनानंदी स्वभाव आणि घोटीच्या मारुती मंदिर ट्रस्टचे विश्वस्त म्हणून त्यांची वेगळी ओळख आहे. कीर्तनकार आणि वारकरी संप्रदायाशी त्यांचा प्रचंड जनसंपर्क आहे. अध्यात्मिक क्षेत्रामध्ये कायम प्रवासाचा त्यांचा गुण आहे. त्यांच्यामुळे त्यांच्या संपर्कात येणारी युवा पिढी व्यसनांपासून दुर झाले आहेत. राजकीय क्षेत्रात काम करताना अनेकांशी मतभेद होतात, पण सर्वांना सोबत घेऊन चालण्याचे कौशल्य त्यांच्याकडे आहे. त्यांचे बंधू भाऊराव जाधव यांचा रसाळ स्वभाव संपूर्ण तालुक्याला माहित असून सुनील भाऊंच्या प्रेरणेने त्यांची यशस्वी वाटचाल सुरु आहे. दुसरे बंधू समाधान जाधव यांनी घोटीसारख्या मोठ्या गावाचे उपसरपंच पद भूषवलेले आहे. सुनील भाऊ यांच्या मार्गदर्शनाने त्यांनी विकासाची अनेक कामे केली. सुनीलभाऊ यांचे चिरंजीव ॲड. नवनाथ जाधव हे नाशिक जिल्हा सत्र न्यायालयात वकिली करतात. गोरगरिबांची कायदेशीर कामे आणि न्याय मिळवून देण्यासाठी सुनिलभाऊ जाधव यांनी त्यांना शिकवण दिलेली आहे. सुनीलभाऊ जाधव यांच्यासारखे व्यक्तिमत्व संपूर्ण नाशिक जिल्ह्यात दुर्मिळ आहे. त्यांच्या वाढदिवसानिमित्त त्यांना वाढदिवसाच्या सस्नेह शुभेच्छा..!
