इगतपुरीनामा न्यूज – इगतपुरी पोलीस ठाण्याच्या हद्दीत एका २४ वर्षीय विवाहित महिलेचा उंचावरून खाली पडून गंभीर दुखापत झाल्यामुळे मृत्यू झाल्याची घटना समोर आली आहे. याबाबत इगतपुरी पोलीस ठाण्यात अकस्मात मृत्यूची नोंद करण्यात आली आहे. सोमी शिवा भगत, वय २४ वर्षे, रा. धारवाडी, ता. इगतपुरी, जि. नाशिक असे महिलेचे नाव आहे. ही घटना ७ सप्टेंबरला सायंकाळी सहा वाजेच्या दरम्यान शेवाळवाडी शिवारातील हिवाळा डोंगराच्या पायथ्याशी, काळदरा ता. इगतपुरी येथे उघडकीस आली. मिळालेल्या माहितीनुसार मयत सोमी शिवा भगत ही ऊंच डोंगरावरून खाली पडल्याने तिला गंभीर दुखापत होऊन तिचा मृत्यू झाला आहे. या प्रकरणी जगन्नाथ आगविले यांनी खबर दिल्यानंतर इगतपुरी पोलीस ठाण्यात अकस्मात मृत्यू दाखल करण्यात आला आहे. ही महिला २५ ऑगस्टपासून बेपत्ता असल्याबाबत इगतपुरी पोलिसांत खबर दाखल करण्यात आली होती. पोलिसांनी पुढील तपास सुरु केला आहे.