इगतपुरीनामा न्यूज – इगतपुरी पोलीस ठाण्याच्या हद्दीत अन्न व औषध प्रशासनाने मोठी कारवाई करत जन आरोग्यासाठी प्रतिबंधित असलेला ७९ लाख २७ हजार १९२ रुपये किमतीचा बेकायदेशीर पानमसाला आणि सुगंधित तंबाखूचा साठा जप्त केला आहे. ही घटना सोमवारी सायंकाळी ७ च्या सुमाराला घडली. आज मंगळवारी पहाटे या प्रकरणी इगतपुरी पोलीस ठाण्यात सुहास जिभाऊ मंडलिक (वय ५४, अन्न सुरक्षा अधिकारी, अन्न व औषध प्रशासन, नाशिक विभाग ) यांनी फिर्याद दिली. त्यानुसार भारतीय न्याय संहिता आणि अन्न सुरक्षा व मानके कायद्यान्वये संशयित आरोपी दिनेश पूनमचंद शर्मा (वय ४७, वाहन चालक, रा. इंदूर, मध्य प्रदेश), जालीम सिंग (रा. सेंट्रल पॉईंट, इंदूर, मध्य प्रदेश) या आरोपीवर याच प्रकारचा गुन्हा ३ जुलै २०२६ रोजी इगतपुरी पोलीस ठाण्यात आधीच दाखल आहे.), भिवंडी येथील अज्ञात खरेदीदार, वाहनाचे अज्ञात मालक ह्या ४ जणांवर गुन्हा दाखल झाला आहे.
आरोपींनी आपसात संगनमत करून आयशर ट्रक क्र. DD 01 Z 9360 मध्ये महाराष्ट्र शासनाने जन आरोग्याच्या दृष्टीने प्रतिबंध केलेल्या ‘प्रिमियम राज निवास सुगंधित पानमसाला’ आणि ‘प्रिमियम झेड-एन-०१ जाफरानी जर्दा’ (सुगंधित तंबाखू) या बेकायदेशीर मालाची भिवंडी येथे विक्री करण्यासाठी वाहतूक केली जात होती. बोरटेंभे फाट्याजवळ हा साठा रंगेहात पकडण्यात आला. अन्न सुरक्षा अधिकाऱ्यांनी पंचनामा करून प्रिमियम राज निवास सुगंधित पानमसाला (पिवळ्या रंगाच्या १४ गोण्या) एकूण ४ हजार ६६२ पाकिटे (किंमत रु. १० लाख ६ हजार ९९२), प्रिमियम राज निवास सुगंधित पानमसाला (गुलाबी रंगाच्या ७५ गोण्या) एकूण २२ हजार ५०० पाकिटे (किंमत ३६ लाख ४५ हजार ), प्रिमियम झेड-एन-०१ जाफरानी जर्दा (हिरव्या रंगाच्या ४ गोण्या) एकूण ४ हजार ८०० पाकिटे (किंमत १ लाख १५ हजार २००), प्रिमियम झेड-एन-०१ जाफरानी जर्दा (गुलाबी रंगाच्या १५ गोण्या) एकूण २२ हजार ५०० पाकिटे (किंमत २१ लाख ६० हजार ), आयशर ट्रक क्र. DD 01 Z 9360 (किंमत १० लाख ) हा मुद्देमाल जप्त केला आहे. इगतपुरी पोलीस पुढील तपास करीत आहेत.