भास्कर सोनवणे : इगतपुरीनामा न्यूज – साधू संतांची मांदियाळी, भाविकांची भक्तीधारा, वैदिक मंत्रोच्चाराची भावधारा आणि वरूणराजाने धरलेल्या जलधारेच्या पावन वातावरणात इगतपुरी तालुक्यातील श्रीक्षेत्र कपिलधारा तीर्थ कावनई येथे गंगा गोदावरी पूजन सोहळा उत्साहात संपन्न झाला. श्री क्षेत्र कपिलधारा तीर्थाचे प्रमुख महंत फलाहारी महाराज यांनी मान्यवरांचे स्वागत केले. आदिनाथ संप्रदाय भारतचे पिठाधीशश्वर श्री श्री जगदगुरु महामंडलेश्वर कल्कीराम महाराज यांच्या संयोजनाखाली संपन्न झालेल्या ह्या कार्यक्रमांची उपस्थितांनी प्रशंसा केली. कुंभमेळा आखाडा परिषदेचे प्रमुख प्रवक्ते श्री महंत डॉ. भक्तीचरणदास महाराज यांच्यासह संत महंत मोठ्या संख्येने हजर होते. त्यांनी आगामी वर्षात १७ ऑगस्ट २०२७ ला भव्य कुंभमेळा शाहीस्नान होणार असल्याची घोषणा केली. राज्याचे अन्न व नागरी पुरवठा मंत्री ना. छगनराव भुजबळ यांनी ह्या सोहळ्यात सहभाग घेतला. यावेळी ना.भुजबळ म्हणाले की, कपिलधारा तीर्थक्षेत्रात यापूर्वीही विविध विकासकामे करण्यात आली आहेत. मात्र येथे अजूनही मोठ्या प्रमाणात विकासकामांची आवश्यकता असून, भाविकांच्या सोयी-सुविधांचा विचार करून विविध विकास योजनांवर काम सुरू आहे. १४६ कोटींची विकासकामे सध्या प्रगतीपथावर आहेत. ही कामे पूर्ण झाल्यानंतर तीर्थक्षेत्रातील सुविधा अधिक सक्षम होतील. आगामी सिंहस्थ कुंभमेळ्याच्या पार्श्वभूमीवर आवश्यक पायाभूत सुविधांच्या विकासाला प्राधान्य देण्यात येत असल्याचेही त्यांनी स्पष्ट केले. इगतपुरी त्र्यंबकेश्वरचे आमदार हिरामण खोसकर यांनी कावनई तीर्थक्षेत्राचे मोठे महत्व असल्याचे सांगत ह्या क्षेत्राला विकसित करण्यासाठी अखंडित पाठपुरावा यशस्वी करण्याचा शब्द दिला. याप्रसंगी माजी आमदार शिवराम झोले, माँ जिजाऊ साहेब यांचे वंशज शिवाजीराजे जाधव, छावाचे विलास पांगारकर, कपिलधारा ट्रस्टचे कुलदीप चौधरी, भाजपा तालुकाध्यक्ष अण्णा डोंगरे, इगतपुरीचे नगरसेवक भूषण जाधव, राज जावरे, रोहिदास डावखर आदी मान्यवर उपस्थित होते. शहापूरचे आमदार दौलत दरोडा, भिवंडीचे आमदार शांताराम मोरे, राष्ट्रवादीचे प्रदेश सरचिटणीस गोरख बोडके, भाजपा जिल्हाध्यक्ष सुनील बच्छाव, इगतपुरीचे उपनगराध्यक्ष मंगेश शिरोळे, कावनईचे सरपंच गोपाळ पाटील, आरोग्य दूत डॉ. महेंद्र शिरसाठ, बाजार समिती संचालक दिलीप चौधरी, सुनील सोनार यांच्याकडून सपत्नीक पूजन करण्यात आले. कुंभमेळा पर्वानिमित्त आज झालेला कार्यक्रम साधू, महंत, भाविक, राजकीय पदाधिकारी यांचे मौलिक साहाय्य अविरत असल्याचे स्पष्ट होते. सर्वांच्या सामूहिक ताकदीने अभूतपूर्व असा उच्च दर्जाचा सोहळा श्री कपिलधारा तीर्थावर करणार असल्याचा संकल्प आदिनाथ संप्रदाय भारतचे पिठाधीशश्वर श्री श्री १०८ जगद्गुरू महामंडलेश्वर कल्कीराम महाराज यांनी आभार मानतांना व्यक्त केला. या कार्यक्रमाला साधू संत, महंत, लोकप्रतिनिधी, अधिकारी, भाविक भक्त मोठ्या संख्येने उपस्थित होते.
