कवितांचा मळा : अंतःकरणातील शब्द

कवयित्री : डाॅ. शैलजा करोडे, नेरूळ नवी मुंबई, 9764808391

अंतःकरणाचे बोल
घेती ह्रदयाचा ठाव
मार्ग दाविती सुगम
खेळे नियती तो डाव

मूक भावनांना रूप
शब्द देतात अचूक
न्याय अन्यायाची चाड
शब्दातून दावी चूक

शब्द सोबती सांगाती
शब्द जोडतात नाती
बोल अंतरीचे मना
उत्साहाला देई गती

शब्द जादुई कुंचला
रंग भरी जीवनात
सुख दुःखाच्या धाग्यांनी
शोभा आणते वस्त्रात

अंतःकरणाचे बोल
उतरता लेखणीत
शुभ्र कागदावरती
मिरवती दिमाखात

शब्दधन अमृताचे
वणव्यात तो गारवा
वाणी रसाळ बनते
देई संतुष्टी मानवा

कवितांचा मळा या सदरासाठी आपण कवी असाल तर मग निश्चितच आपलंही साहित्य पाठवू शकता. नवनाथ अर्जुन पा. गायकर यांच्या 9881329709 क्रमांकावर आपल्या कविता पाठवाव्यात.