इगतपुरी त्र्यंबकच्या ४,३१६ दिव्यांगांना ६ हजार पेन्शन द्या : हिवाळी अधिवेशनात आवाज उठवण्याचा आ. खोसकरांचा नितीन गव्हाणे यांना शब्द

इगतपुरीनामा न्यूज – इगतपुरी त्र्यंबकेश्वर तालुक्यातील दिव्यांग बांधवांना मिळणारे मासिक पेन्शन २ हजार ५०० रुपयांवरून थेट ६ हजार रुपये करण्याची आग्रही मागणी प्रहार दिव्यांग संघटनेचे इगतपुरी तालुकाध्यक्ष नितीन गव्हाणे पाटील यांनी आमदार हिरामण खोसकर यांना निवेदनाद्वारे केली आहे. या मागणीसाठी आगामी हिवाळी अधिवेशनात तारांकित प्रश्न उपस्थित करण्यासह मुख्यमंत्र्यांकडे लेखी मागणी करण्याचे ठोस आश्वासन आमदार खोसकर यांनी दिले आहे. दिव्यांग बांधवांना रोजगार, आरोग्य सुविधा आणि दळणवळणाच्या अनेक समस्यांना तोंड द्यावे लागते. दोन्ही तालुक्यांतील ४ हजार ३१६ दिव्यांग बांधवांच्या वतीने पेन्शन वाढीचा प्रश्न मांडण्यात आला आहे. मूकबधिर, अंध, अस्थिव्यंग, मतिमंद यांसह सर्व प्रकारच्या दिव्यांगांना कोणताही भेदभाव न करता सरसकट ६ हजार रुपये मासिक पेन्शन मिळावी अशी मागणी निवेदनात नमूद आहे. आमदार खोसकर यांनी नागपूरच्या हिवाळी अधिवेशनात हा प्रश्न प्राधान्याने मांडण्याची ग्वाही दिल्याने दिव्यांग बांधवांमध्ये आशेचे वातावरण निर्माण झाले आहे.

प्रलंबित यूडीआयडी कार्ड व प्रमाणपत्रांसाठी इगतपुरी, घोटी आणि त्र्यंबकेश्वर येथे विशेष शिबिरे आयोजित करावी. ग्रामपंचायत, पंचायत समिती आणि नगरपरिषदांचा दिव्यांगांसाठी राखीव असलेला ५ टक्के निधी पारदर्शकपणे खर्च करावा, घरकुल योजनांमध्ये दिव्यांगांना प्राधान्य द्यावे. स्वयंरोजगारासाठी कर्ज व अनुदान उपलब्ध करून द्यावे. दिव्यांग विद्यार्थ्यांसाठी विशेष शिक्षक, शिष्यवृत्ती, वाहतूक व वसतिगृहाची सोय करावी. नियमित आरोग्य तपासणी, फिजिओथेरपी, कृत्रिम अवयव, व्हीलचेअर,, श्रवणयंत्रे मोफत उपलब्ध करून द्यावीत. एसटी प्रवासात सवलत, रेल्वे स्थानकांवर रॅम्प व व्हीलचेअर, शासकीय कार्यालयांमध्ये स्वतंत्र दिव्यांग कक्ष आणि सार्वजनिक ठिकाणी सुलभ स्वच्छतागृहांची व्यवस्था करावी. ३ डिसेंबर हा जागतिक दिव्यांग दिन प्रत्येक स्थानिक स्वराज्य संस्थेत साजरा करून स्थानिक स्तरावरच दिव्यांगांचे प्रश्न मार्गी लावावेत. दिव्यांगांप्रमाणेच ज्येष्ठ नागरिक, विधवा, घटस्फोटित व एकल महिला आणि दुर्धर आजारग्रस्तांच्या मासिक मानधनातही वाढ करण्याची मागणी संघटनेने केली आहे. ग्रामीण व डोंगराळ भागातील महागाई आणि आर्थिक परिस्थिती लक्षात घेता सध्याच्या तुटपुंज्या अनुदानात कुटुंबाचा उदरनिर्वाह करणे कठीण होत असल्याचे निवेदनात आहे.

"राज्यातील सर्व दिव्यांगांना समान आणि सन्मानजनक पेन्शन मिळावी, प्रलंबित मागण्यांवर शासनाने ठोस निर्णय घ्यावा. आमदार हिरामण खोसकर यांनी हा प्रश्न अधिवेशनात मांडण्याचे आश्वासन दिल्याबद्दल आम्ही सर्व दिव्यांग बांधवांच्या वतीने त्यांचे आभार मानतो."
- नितीन गव्हाणे पाटील, इगतपुरी तालुकाध्यक्ष, प्रहार दिव्यांग संघटना
error: Content is protected !!