शांताराम भांगे : इगतपुरीनामा न्यूज – महाराष्ट्राचे सर्वोच्च शिखर आणि आदिवासींचे कुलदैवत असलेल्या आई कळसुबाईच्या मंदिराला यंदा नवरात्रोत्सवानिमित्त आकर्षक वारली चित्रकलेचा साज चढवण्यात आला आहे. दरवर्षी प्रमाणे यंदाही स्थानिक मित्र मंडळ, जहागीरदारवाडी व बारी यांच्या वतीने हा उपक्रम राबवण्यात आला. शिलेदारांनी तब्बल ५ दिवस अथक मेहनत घेऊन संपूर्ण मंदिर परिसर वारली चित्रकलेने नटवला आहे. या चित्रकलेतून आदिवासी रूढी, प्रथा व परंपरेचे जिवंत दर्शन घडवण्यात आले आहे. आदिवासींचा पारंपारिक तारपा नृत्य, होळी सणाचा उत्साह, दैनंदिन जीवनमान, निसर्गदेवतेची उपासना अशा विविध विषयांचे सुंदर चित्रीकरण करण्यात आले आहे. विशेष म्हणजे भाविकांसाठी पायथ्यापासून शिखरापर्यंत सोलर दिवा उचलून नेऊन मंदिरात बसवण्यात आला आहे. त्यामुळे रात्रीच्या वेळी हे वारली चित्रकलेचे आकर्षक रूप अधिकच खुलून दिसत आहे.
हे सर्व चित्रीकरण प्रसिद्ध वारली चित्रकार रमेश साबळे व पूजा साबळे या दाम्पत्याने आपल्या कुशल हातांनी साकारले आहे. त्यांच्या मेहनतीमुळे कळसुबाई शिखराची शोभा द्विगुणित झाली आहे. याचबरोबर नवरात्रोत्सवानिमित्त स्थानिक जहागीरदारवाडीचे सरपंच पंढरीनाथ खाडे, उपसरपंच नामदेव कर्टूले, संतोष खाडे, जयराम खाडे, अंकुश कर्टूले, माजी सरपंच हिरामण खाडे यांच्या उपस्थितीत घटस्थापना करण्यात आली. “नवरात्र उत्सवामध्ये शिखरावर येणाऱ्या सर्व भाविकांनी स्वतःची काळजी घेऊन शिखर सर करावे. आपण सोबत आणलेला कचरा, पाण्याच्या बॉटल्स शिखरावर न टाकता खाली घेऊन याव्यात. ज्या शिलेदारांनी शिखरावर मेहनत घेऊन रंगरंगोटी व स्वच्छता करून शिखराची शोभा वाढवली त्या सर्वांचे खूप खूप आभार,” असे सरपंच पंढरीनाथ खाडे यांनी सांगितले.
