इगतपुरीनामा न्यूज – युवतींना सुरक्षित आणि आत्मविश्वासपूर्ण जीवन जगण्यासाठी आवश्यक कौशल्ये प्रदान करण्याच्या उद्देशाने, सावित्रीबाई फुले पुणे विद्यापीठ आणि नाशिप्रचे कला व वाणिज्य महाविद्यालय, इगतपुरी यांच्या संयुक्त विद्यमाने (विद्यार्थी विकास मंडळ अंतर्गत) ‘निर्भय कन्या अभियान’ कार्यशाळेचे आयोजन करण्यात आले होते. ही कार्यशाळा १२ ऑक्टोबर २०२६ रोजी महाविद्यालयात उत्साहात पार पडली. कार्यक्रमाच्या अध्यक्ष महाविद्यालयाच्या प्राचार्या प्रतिभा सोनवणेयांनी “विद्यार्थिनींनी केवळ पुस्तकी शिक्षणावर न थांबता आत्मविश्वास, स्वसंरक्षण, कायदेविषयक ज्ञान आणि सामाजिक जाणीव विकसित केली पाहिजे. कोणत्याही भीतीला बळी न पडता युवतींनी सक्षम आणि स्वावलंबी बनावे,” असे आवाहन केले. प्रास्ताविक प्रा. एस. एस. सांगळे यांनी केले.
डॉ. पूनम पाटील यांनी मानसिक आरोग्याविषयी मार्गदर्शन करतांना समाजात मानसिक आरोग्याकडे बघण्याचा सकारात्मक दृष्टिकोन निर्माण व्हावा, यावर भर दिला. कराटे प्रशिक्षक विशाल जगताप यांनी प्रात्यक्षिकासह स्वसंरक्षणाचे धडे दिले. आयुष्यात येणाऱ्या कठीण प्रसंगांना आत्मविश्वासाने सामोरे जाण्यासाठी प्रत्येक युवतीला स्वसंरक्षणाचे ज्ञान असणे आवश्यक असल्याचे त्यांनी सांगितले. ॲड. सचिन उघाडे यांनी महिलांचे हक्क आणि अधिकारांवर सखोल मार्गदर्शन केले. त्यांनी महिलांवरील अत्याचारासंदर्भातील कायदे, तक्रार नोंदवण्याची पद्धत आणि आपत्कालीन परिस्थितीत उपलब्ध कायदेशीर उपायांची माहिती दिली. अन्याय व छळ सहन न करता कायदेशीर मदत घेण्याचे आवाहन त्यांनी केले. डॉ. रूपाली नांद्रे यांनी शारीरिक आरोग्याविषयी उपयुक्त माहिती दिली. यावेळी सर्व महिला प्राध्यापक, कर्मचारी आणि विद्यार्थिनी मोठ्या संख्येने उपस्थित होत्या. सूत्रसंचालन प्रा. डॉ. एल. एस. अहिरे यांनी तर प्रा. बी. एस. मोरे यांनी छायाचित्र संकलन केले. विद्यार्थी प्रतिनिधी कु. मनाली गोसावी हिने आभार मानले.
