शहाबाज शेख : इगतपुरीनामा न्यूज – अडसरे बुद्रुक येथे माध्यमिक विद्यालयात वन्यजीव सप्ताहानिमित्त वन्यजीव संरक्षण व वनसंवर्धनाबाबत जनजागृती कार्यक्रम उत्साहात पार पडला. विद्यार्थ्यांमध्ये वन्यजीव, पर्यावरण व जैवविविधतेबाबत जागरूकता निर्माण करण्याच्या उद्देशाने या कार्यक्रमाचे आयोजन करण्यात आले होते. कार्यक्रमावेळी भंडारदरावाडीचे वनपरिमंडळ अधिकारी, एस. बी. महाले, बारशिंगवेचे वनरक्षक सुदाम आवारे, अडसरेचे वनरक्षक पी. जी. साबळे, खेडच्या वनरक्षक वैशाली पासलकर, भंडारदरावाडीचे वनरक्षक एस. ए. गवळी, धामणीचे वनरक्षक सी. ए. करके, मुख्याध्यापक, शिक्षक आणि विद्यार्थी उपस्थित होते.
नाशिक विभाग रेस्क्यू टीमचे वैभव भोगले यांनी विद्यार्थ्यांना वन्यजीव संरक्षण, वनसंवर्धन आणि जैवविविधतेचे महत्त्व याबाबत मार्गदर्शन केले. वन्यजीवांचे अधिवास, पर्यावरणातील त्यांचे महत्त्व तसेच वन्यप्राण्यांचे संरक्षण करण्यासाठी नागरिकांनी घ्यावयाची काळजी याबाबत विद्यार्थ्यांना माहिती देण्यात आली. वन्यजीव व पर्यावरणाचे संवर्धन ही केवळ वनविभागाची जबाबदारी नसून प्रत्येक नागरिकाचे कर्तव्य आहे, असा संदेश या कार्यक्रमातून देण्यात आला. विद्यार्थ्यांनीही वन्यजीव संरक्षण व पर्यावरण संवर्धनासाठी जनजागृती करण्याचा संकल्प केला. कार्यक्रमामुळे विद्यार्थ्यांमध्ये वन्यजीव आणि निसर्ग संवर्धनाबाबत उत्सुकता व जागरूकता निर्माण झाली.