इगतपुरीनामा न्यूज – नागपूर–मुंबई दुरांतो एक्सप्रेसवर इगतपुरी कसारा घाट परिसरात दगडफेक केल्याची घटना समोर आली आहे. या घटनेत ट्रेनच्या ए-१ कोचमधील खिडकीची काच फुटली. प्रवाशांच्या सुरक्षेला धोका निर्माण करणाऱ्या या प्रकाराची आरपीएफने गंभीर दखल घेत संशयिताला अटक केली आहे. आज सोमवारी पहाटे ६.३५ वाजता आरपीएफला ट्रेन क्रमांक१२२९० अप दुरांतो एक्सप्रेसवर दगडफेक झाल्याची माहिती मिळाली. इगतपुरी टी जी आर १ रेल्वेमार्गावरील किलोमीटर क्रमांक १३५/२१७ जवळ ही घटना घडली. दगडफेकीमुळे ए-१ कोचमधील बर्थ क्रमांक ५ जवळील खिडकीची काच फुटल्याची माहिती ऑन ड्युटी टीटीईकडून देण्यात आली. माहिती मिळताच आरपीएफच्या पथकाने घटनास्थळी धाव घेत परिसरात शोधमोहीम सुरू केली. दरम्यान, घटनास्थळापासून सुमारे ५०० मीटर अंतरावर डोंगराळ व जंगल परिसरातील रस्त्यावर एक संशयित व्यक्ती आढळून आली. चौकशीदरम्यान त्याने आपले नाव संजय तातू सोनवणे (वय ४३, रा. चिमणवाडी, सिद्धार्थनगर, इगतपुरी) असल्याचे सांगितले. चौकशीत त्याने मुंबईच्या दिशेने जाणाऱ्या ट्रेनवर दगड फेकल्याची कबुली दिल्याचे आरपीएफने नमूद केले आहे. या प्रकरणी आरोपीविरुद्ध रेल्वे कायद्याच्या कलम १५३ आणि १४७ अन्वये गुन्हा दाखल करण्यात आला आहे. आरोपीविरुद्ध यापूर्वीही २०२३ मध्ये रेल्वे कायद्याच्या कलम १५३ अंतर्गत गुन्हा दाखल असल्याची माहिती समोर आली आहे. आरोपीला वैद्यकीय तपासणीनंतर इगतपुरी न्यायालयात हजर करण्यात आले. न्यायालयाने त्याला २४ ऑगस्टपर्यंत न्यायालयीन कोठडी सुनावली आहे. या प्रकरणाचा पुढील तपास आरपीएफ पोस्ट इगतपुरीचे एएसआय एस. बी. तिडके करीत आहेत. व्हिडीओ बातमी पहा https://youtube.com/shorts/E6AgnooODYg?si=OdROyqBg1E9y1YEX
