इगतपुरीनामा न्यूज – त्र्यंबकेश्वर तालुक्यातील खरोली परिसरात मोटारसायकल बंद पडल्याने रस्त्याच्या कडेला उभ्या असलेल्या सलून व्यावसायिकाला स्कॉर्पिओ चालकाने शिवीगाळ व दमदाटी करत मारहाण केल्याची घटना समोर आली आहे. या मारहाणीत संबंधित व्यक्तीच्या चेहऱ्याला दुखापत झाल्याची तक्रार पोलिसांत दाखल करण्यात आली आहे. फिर्यादी अनिल सुरेश रायकर (वय ४५, रा. खरोली, ता. त्र्यंबकेश्वर) यांच्या तक्रारीनुसार ते ७ ऑगस्टला सायंकाळी सव्वासहाच्या सुमारास त्र्यंबकेश्वरहून खरोली येथे आपल्या मोटारसायकलवरून जात होते. द्विन माउंटन रिसॉर्टजवळ त्यांची स्लेंडर मोटारसायकल अचानक बंद पडल्याने ते रस्त्याच्या बाजूला उभे होते. यावेळी हॉटेलच्या दिशेने आलेली MH 15 JS 0070 क्रमांकाची स्कॉर्पिओ कार त्यांच्या मागून आली. कारचालकाने रायकर यांना रस्त्याच्या मध्ये का उभे राहता असे म्हणत वाद घातल्याचे तक्रारीत नमूद आहे. रायकर यांनी आपण रस्त्याच्या खाली बाजूला उभे असल्याचे सांगितल्यानंतर चालकाने त्यांच्याशी शिवीगाळ व दमदाटी केल्याचा आरोप आहे. त्यानंतर संबंधित चालकाने कारमधून काहीतरी धारदार वस्तू बाहेर काढून रायकर यांना मारहाण केली. या मारहाणीत त्यांच्या चेहऱ्याला दुखापत झाल्याचे तक्रारीत म्हटले आहे. घटना सुरू असताना परिसरातील गणपत रामभाऊ आहेर, गणेश कृष्णा पेहरे, भरत विठ्ठल गुंज आणि काशिनाथ चंदर पेहरे यांनी मध्यस्थी करत भांडण सोडविल्याचे फिर्यादीने सांगितले. मात्र, त्यानंतरही स्कॉर्पिओ चालकाने रायकर यांच्यासह मध्यस्थी करणाऱ्या व्यक्तींना शिवीगाळ व दमदाटी केली आणि स्कॉर्पिओ घेऊन नाशिकच्या दिशेने निघून गेल्याचे तक्रारीत नमूद आहे. या प्रकरणी अनिल रायकर यांनी संबंधित स्कॉर्पिओ चालकाविरोधात पोलिसांकडे फिर्याद दिली असून, पोलिसांकडून घटनेचा पुढील तपास केला जात आहे. तक्रारीतील आरोपांची चौकशी करून मारहाणीचे नेमके कारण आणि घटनेतील वस्तुस्थिती स्पष्ट होणार आहे.
