इगतपुरीनामा न्यूज – स्व. शिला प्रभाकर सोनजे रा. राजीव नगर, नाशिक यांच्या उत्तरकार्य व गंधमुक्ती कार्यक्रमाला समाजोपयोगी उपक्रमाची जोड मिळाली. उपस्थित लोकांच्या सहकार्याने वृद्धाश्रमासाठी २१ हजार रुपयांची देणगी संकलित करण्यात आली. दुःखाच्या प्रसंगातही समाजाप्रती असलेली जबाबदारी जपणारे उद्योजक योगेश प्रभाकर सोनजे व परिवाराचे सर्व स्तरांतून कौतुक होत आहे. नाशिकच्या माहेरघर मंगल कार्यालयात झालेल्या कार्यक्रमात स्वानंद वारकरी शिक्षण संस्था, बलायदुरीचे हभप विजय महाराज चव्हाण यांनी आईवडिलांचे जीवनातील महत्त्व, सुसंस्कारित कुटुंब व्यवस्था, देवाचे नामस्मरण आणि मानवी जीवनातील मूल्ये या विषयांवर हृदयस्पर्शी प्रवचन केले. त्यांच्या विचारांनी उपस्थितांना भावनिक आणि आध्यात्मिक संदेश मिळाला.
यावेळी इंदिरानगर येथील ‘निरामय केअर सेंटर’ वृद्धाश्रमासाठी देणगी संकलनाचे आवाहन प्रकाश सोनजे यांच्या वतीने करण्यात आले. यासाठी दोन दानपेट्या ठेवून, “शक्य तेवढी मदत करा” असे आवाहन उपस्थितांना करण्यात आले. या आवाहनाला शोकाकुल नातेवाईक, मित्रपरिवार आणि उपस्थित नागरिकांनी उत्स्फूर्त प्रतिसाद दिला. सोनजे परिवाराच्या पुढाकारासह २१ हजार रुपयांची देणगी संकलित झाली. ही रक्कम वृद्धाश्रमाच्या सेवाकार्यासाठी सुपूर्द करण्यात आली. निरामय केअर सेंटरचे सर्वेसर्वा डॉ. योगेश सदगीर यांनी या अनोख्या समाजोपयोगी उपक्रमाचे कौतुक करत सोनजे परिवार आणि सर्व देणगीदारांचे आभार मानले. या उपक्रमाच्या यशस्वी आयोजनासाठी योगेश प्रभाकर सोनजे, सचिनकुमार सुधाकर कोतकर, सुषमा सचिनकुमार कोतकर, ललिता निलेश धामणे, कल्याणी योगेश सोनजे, प्रियंका अतुल शिरोडे यांनी विशेष परिश्रम घेतले. दुःखाच्या प्रसंगालाही समाजसेवेची दिशा देत गरजू वृद्धांच्या सेवेसाठी उचललेले हे पाऊल समाजासमोर नक्कीच प्रेरणादायी उदाहरण ठरले.
