इगतपुरीनामा न्यूज – इगतपुरी तालुक्यातील शेणवड खुर्द येथील आदिवासी आश्रमशाळेजवळ २ बिबट्यांचा मुक्त संचार असल्याचे समोर आले आहे. यामुळे विद्यार्थी, पालक आणि ग्रामस्थांमध्ये भीतीचे वातावरण निर्माण झाले आहे. मध्यरात्री कामावरून घरी परतणाऱ्या एका वाहनचालकाला हे दोन्ही बिबटे रस्त्यावर दिसून आले. त्याने प्रसंगावधान राखत ही संपूर्ण घटना आपल्या मोबाईल कॅमेऱ्यात कैद केली. या घटनेनंतर परिसरात भीतीचे वातावरण अधिकच गडद झाले आहे. स्थानिकांच्या म्हणण्यानुसार, याच बिबट्याने काही दिवसांपूर्वी गरुडेश्वर येथील एका शेतकऱ्याच्या घरासमोरील ओसरीत बांधलेल्या बकरीवर हल्ला करून तिला ठार केले. त्यामुळे परिसरातील नागरिकांमध्ये दहशतीचे वातावरण आहे.
विशेष म्हणजे, शेणवड खुर्द येथील आदिवासी आश्रमशाळेत अनेक विद्यार्थी शिक्षण घेत असून शाळेच्या परिसरात तसेच आसपासच्या रस्त्यांवर बिबट्यांचा वावर असल्याने विद्यार्थ्यांच्या सुरक्षिततेचा प्रश्न ऐरणीवर आला आहे. सकाळी आणि सायंकाळी शाळेत ये जा करणाऱ्या विद्यार्थ्यांसह ग्रामस्थांनाही आता सतर्क राहावे लागत आहे. वन विभागाने तातडीने या परिसराची पाहणी करून बिबट्यांचा बंदोबस्त करण्याची मागणी नागरिकांकडून होत आहे. सामाजिक कार्यकर्ते तुकाराम वारघडे यांनीही वनविभागाला तातडीने पिंजरा लावून बिबट्याला जेरबंद करण्याची मागणी केली. बिबट्याचा बंदोबस्त न झाल्यास विद्यार्थ्यांच्या आणि नागरिकांच्या सुरक्षेसाठी तीव्र आंदोलन छेडण्याचा इशाराही त्यांनी दिला. नागरिकांनी रात्रीच्या वेळी अनावश्यक बाहेर पडणे टाळावे, लहान मुलांना एकटे पाठवू नये आणि बिबट्याचे दर्शन झाल्यास तत्काळ वन विभाग अथवा पोलिसांना माहिती द्यावी असे आवाहन करण्यात आले आहे. वन विभाग या घटनेची गंभीर दखल घेऊन कोणती उपाययोजना करतो, याकडे आता सर्वांचे लक्ष लागले आहे. व्हिडीओ पहा https://youtube.com/shorts/3ESgytnRnlI?si=A1WfOcKUlW1e68Js
