इगतपुरीनामा न्यूज – इगतपुरी तालुक्यातील अतिदुर्गम वस्ती असलेल्या आवळखेड वाडी येथे विद्यार्थ्यांच्या मूलभूत गरजांची पूर्तता करणारा प्रेरणादायी सामाजिक उपक्रम नुकताच यशस्वीरीत्या पार पडला. पेहेचान प्रगती फाउंडेशन, मुंबईच्या सहकार्याने आवळखेड जिल्हा परिषद शाळेत पिण्याच्या पाण्याची कायमस्वरूपी सुविधा उपलब्ध करून देण्यात आली. पेहेचान प्रगती फाउंडेशनच्या अध्यक्षा प्रगती अजमेरा यांच्या पुढाकारातून शाळेसाठी अंडरग्राउंड पाण्याची टाकी उभारण्यात आली. या टाकीसाठी आर्थिक सहाय्य करणाऱ्या दानशूर व्यक्तींनी नाव प्रसिद्ध न करण्याच्या अटीवर सढळ हाताने मदत केली आहे. दरवर्षी उन्हाळ्यात तीव्र पाणीटंचाईचा सामना करणाऱ्या या वाडीतील विद्यार्थ्यांसाठी ही सुविधा मोठा दिलासा ठरणार आहे. धामडकी जिल्हा परिषद शाळेचे मुख्याध्यापक राज्य आदर्श शिक्षक प्रमोद परदेशी यांच्या सातत्यपूर्ण पाठपुराव्यामुळे हा महत्त्वपूर्ण उपक्रम यशस्वीरीत्या पूर्णत्वास गेला.
पाण्याच्या टाकीसाठी आवश्यक पाणीपुरवठा रचना माखरिया यांच्या सौजन्याने टँकर सुविधेद्वारे उपलब्ध करून देण्यात आला. पेहेचान प्रगती फाउंडेशनच्या अध्यक्षा प्रगती अजमेरा व उपस्थित सदस्यांच्या हस्ते पाणी सुविधा उदघाटन सोहळा उत्साहात पार पडला. यानिमित्त विद्यार्थ्यांना पाहुण्यांकडून आमरस वं पुरणपोळीचे जेवण देण्यात आले. त्यामुळे विद्यार्थ्यांमध्ये आनंदाचे व उत्साहाचे वातावरण निर्माण झाले. या कार्यक्रमाला पेहेचान प्रगती फाउंडेशनच्या सदस्या गुरुदेव दुहरा, ग्याना डालमिया, हर्षा संजय सोनी व भारती पतंगिया, शाळा व्यवस्थापन समिती अध्यक्ष विलास पवार, मधुकर रोंगटे, मारुती कुंदे, प्रकाश ठाकरे, वैशाली चौरे, मच्छिंद्र भागडे यांच्यासह ग्रामस्थ, पालक व शिक्षक मोठ्या संख्येने उपस्थित होते. दुर्गम भागातील विद्यार्थ्यांना स्वच्छ पिण्याचे पाणी उपलब्ध करून देत शिक्षणासाठी पोषक वातावरण निर्माण करण्याचा हा उपक्रम सामाजिक संवेदनशीलता, सहकार्यभावना आणि समाजाप्रती असलेल्या बांधिलकीचे उत्कृष्ट उदाहरण ठरत आहे.
