इगतपुरीनामा न्यूज – प्रजासत्ताक दिनानिमित्त इगतपुरी तालुक्यातील पिंपळगाव डुकरा ग्रामपंचायत कार्यालय आणि जिल्हा परिषद शाळेचे ध्वजारोहन एकल महिलेच्या हस्ते करण्यात आले. प्रजासत्ताक दिनाला एकल महिलांना ध्वजारोहन करण्याचा सन्मान दिला गेल्याने ग्रामस्थांनी कौतुक केले. ग्रामपंचायत कार्यालय पिंपळगाव डुकरा येथे एकल महिला श्रीमती शकुंतला पांडुरंग जाधव यांनी तर जिल्हा परिषद शाळा पिंपळगाव डुकरा येथे एकल महिला श्रीमती कविता तानाजी भगत यांच्या हस्ते उत्साहपूर्ण वातावरणात ध्वजारोहण करण्यात आले. समाजातील महिलाशक्तीला प्रोत्साहन देण्यासाठी आणि एकल महिलांच्या आत्मनिर्भरतेचा सन्मान करण्यासाठी एकल महिलांना ध्वजारोहणाचा विशेष सन्मान मिळाल्याने महिलांनी आनंद व्यक्त केला. राष्ट्रगीत व ‘भारत माता की जय’च्या घोषणांनी परिसर दुमदुमला. यावेळी संविधान शपथ व बाल विवाह प्रतिबंध शपथ घेण्यात आली. ग्रामपंचायत अधिकारी हर्षिता पिळोदेकर म्हणाल्या की, तिरंगा फडकवण्याची एकल महिलांना मिळालेली संधी अत्यंत भावनिक आणि अभिमानाची आहे. परिस्थितीवर मात करून जगणाऱ्या प्रत्येक महिलेसाठी हा सन्मान प्रेरणादायी आहे. या उपक्रमाने आम्ही महिला सक्षमीकरणाचे एक पाऊल पुढे टाकले आहे.
मुख्यमंत्री समृद्ध पंचायत राज अभियान २०२५-२६ अंतर्गत तसेच आदर्श महिला व बालिका स्नेही ग्रामपंचायत अंतर्गत नाशिक जिल्हा परिषदेचे मुख्य कार्यकारी अधिकारी ओंकार पवार यांच्या संकल्पनेतून नवचेतना अभियानाचा शुभारंभ करण्यात आलेला आहे. हा स्तुत्य उपक्रम पिंपळगाव डुकरा ग्रामपंचायतीमध्ये राबवला जात आहे. त्यानुसार घटस्फोटित महिला, विधवा, एकल महिलांना समानतेची व सन्मानजनक वागणूक देण्यासाठी परिश्रम घेतले जात आहेत. भारतीय राज्यघटनेनुसार प्रत्येक नागरिकाला समानतेची वागणूक मिळण्याचा अधिकार आहे. एकल महिलांवर लादलेल्या जुन्या रुढी परंपरा कायमस्वरूपी निघण्यासाठी शासनाचे सर्वतोपरी प्रयत्न सुरु आहेत. या अभियानानुसार आज २६ जानेवारी प्रजासत्ताक दिनी पिंपळगाव डुकरा ग्रामपंचायतीच्या उपक्रमाचे तालुकाभर कौतुक होत आहे. ग्रामस्थ, शासकीय कर्मचारी यांनी याकामी सहकार्य केले.
