इगतपुरीनामा न्यूज – सावित्रीबाई फुले पुणे विद्यापीठ अंतर्गत नाशिप्र मंडळाचे कला व वाणिज्य महाविद्यालय इगतपुरी आणि आजीवन अध्ययन विस्तार विभागाच्या संयुक्त विद्यमाने कायदा साक्षरता व आदिवासी विकास हा कार्यक्रम २२ व २३ जानेवारी रोजी संपन्न झाला. ज्ञानज्योती सावित्रीबाई फुले यांची प्रतिमा पूजन व दीपप्रज्वलनाने कार्यक्रम सुरु झाला. कार्यक्रमाच्या अध्यक्षा प्राचार्य प्रतिभा हिरे, कार्यक्रम अधिकारी प्रा. बी. एस. मोरे, प्रमुख वक्ते ॲड. महेश म्हसणे, सचिन रामदास मुसळे उपस्थित होते. अन्यायाविरुद्ध आवाज उठवण्यासाठी कायद्याची गरज असते आणि तो माहिती असणे गरजेचे आहे असे ॲड. महेश म्हसणे यांनी ‘कायदा साक्षरता ‘ विषयावर व्याख्यानात नमूद केले. विविध डिजिटल क्षेत्रात येणाऱ्या ट्रेंडच्या मोहात आपण आपली वैयक्तिक माहिती सहज असुरक्षित ठिकाणी देऊ नये असे सायबर सिक्युरिटी बद्दल सचिन रामदास मुसळे यांनी सांगितले. प्रा. बी. एस. मोरे यांनी प्रास्ताविकात आजीवन अध्ययन विस्तार विभाग व कार्यक्रमाचे महत्व सांगितले. सूत्रसंचालन कु. मनाली गोसावी हिने तर आभार कु. सोनल गायकवाड या विद्यार्थिनीने मानले.
कार्यक्रमाच्या दुसऱ्या दिवशी ‘आदिवासी विकास ‘ कार्यक्रमासाठी डॉ. बाळू घुटे, प्रा. रविंद्र नाडेकर प्रमुख वक्ते म्हणून उपस्थित होते. आदिवासी विकास होण्यासाठी उपाययोजना व माहितीचा प्रसार लाभार्थ्यांना लाभ मिळावा म्हणून प्रयत्न करणे. हे भारताचे नागरिक म्हणून आपले कर्तव्य आहे असे प्रा. रविंद्र नाडेकर यांनी सांगितले. आदिवासी संस्कृती व साहित्य खुप सृजनशील आहे असे डॉ. घुटे यांनी नमूद करताना अनेक आदिवासी परंपरा, साहित्य, भाषा, सण साजरे करण्याची पद्धत या बद्दल माहिती दिली. या कार्यक्रमात अनेक विद्यार्थी उत्साहाने सहभागी झाले होते. सूत्रसंचालन प्रा. जे. एस. भालेराव यांनी, आभार प्रा. अविनाश कासार यांनी मानले. कार्यक्रम अधिकारी प्रा. बी. एस. मोरे, कार्यक्रमाचे अध्यक्ष स्टाफ सेक्रेटरी डॉ. एल. एस. आहिरे यांनी मार्गदर्शन केले. छायाचित्र संकलन डॉ. दिपाली तोटे यांनी केले. सर्व प्राध्यापक वर्ग व विद्यार्थिनी कार्यक्रमास उपस्थित होते.