इगतपुरीनामा न्यूज – समृद्धी महामार्गाचा वापर करून राज्याबाहेर किंवा अन्य जिल्ह्यांत होणारी राज्यातील प्रतिबंधित पदार्थांची तस्करी रोखण्यासाठी पोलीस आणि संबंधित यंत्रणा सतर्क झाल्या आहेत. याच सतर्कतेतून इगतपुरी पोलिसांनी अन्न व औषध प्रशासनाच्या (FDA) मदतीने एका कंटेनरवर मोठी कारवाई केली आहे. इगतपुरीजवळ समृद्धी टोलनाका इंटरचेंजजवळ गुरुवारी रात्री अकराच्या सुमाराला अवैधरीत्या बंदी असलेली सुगंधित तंबाखू व जर्दा वाहतूक करणारा कंटेनर पकडण्यात पोलिसांना यश आले असून, एकूण ६९ लाख ३३ हजार रुपये किमतीचा साठा जप्त करण्यात आला आहे. गोपनीय माहितीच्या आधारे, इगतपुरी पोलीस आणि अन्न व औषध प्रशासनाच्या पथकाने समृद्धी महामार्गावर सापळा रचला होता. दरम्यान, संशयास्पद वाटणारा कंटेनर MH27 DT 1369 तपासणीसाठी थांबवण्यात आला. त्याची झडती घेतली असता, आतमध्ये मोठ्या प्रमाणात प्रतिबंधित असलेला सुगंधित तंबाखू आणि जर्दा आढळून आले. या कारवाईत पोलिसांनी प्रतिबंधित सुगंधित तंबाखू व जर्दा असा एकूण ६९ लाख ३३ हजार रुपयांचा मुद्देमाल जप्त केला आहे. गुटखा तस्करीसाठी वापरण्यात आलेला कंटेनरही पोलिसांनी ताब्यात घेतला आहे. या प्रकरणी सुहास जिभाऊ मंडलिक, वय ५४ वर्षे, अन्न सुरक्षा अधिकारी, अन्न व औषध प्रशासन (म.रा.), सह आयुक्त नाशिक विभाग यांच्या फिर्यादीवरून राजेश गोवर्धनलालजी वर्मा ( माळी ) वय ५३, रा डोसीगांव ता. जि. रतलाम, मध्यप्रदेश, जालीम सिंग, रा. सेन्ट्रल पॉईंट, इंदोर, मध्य प्रदेश, एका मोबाईल नंबर वरील कॉल करणारा अज्ञात इसम ( नाव गाव माहित नाही )या ३ संशयित आरोपींवर इगतपुरी पोलीस ठाण्यात गुन्हा दाखल करण्यात आला आहे. इगतपुरीच्या पोलीस निरीक्षक सारिका अहिरराव यांनी पुढील तपास सुरु केला आहे. समृद्धी महामार्गासारख्या महत्त्वाच्या मार्गाचा वापर गुन्हेगारी कृत्यांसाठी होऊ नये, यासाठी पोलिसांनी यापुढेही तपासणी अधिक कडक करण्याचे संकेत दिले आहेत.