कारची काच फोडून १० लाखांची रोकड लंपास : अज्ञात चोरट्याविरुद्ध गुन्हा दाखल

इगतपुरीनामा न्यूज – इगतपुरी शहरातील खालची पेठ परिसरात उभ्या असलेल्या मोटार कारची काच फोडून अज्ञात चोरट्याने १० लाख रुपयांची रोकड चोरून नेल्याची घटना समोर आली आहे. याप्रकरणी इगतपुरी पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे. फिर्यादी गंगाराम विठ्ठल भागडे, वय ३९, धंदा- शेती/बांधकाम व्यवसाय, रा. नांदगाव सदो, ता. इगतपुरी, जि. नाशिक यांनी १९ नोव्हेंबरला दुपारी २ ते ३ वाजेच्या दरम्यान आपली स्विफ्ट कार क्र. MH 46 N 8998 इगतपुरीतील खालची पेठ भागातील श्रीमती वाजे मॅडम यांच्या कार्यालयासमोर लॉक करून उभी केली होती. याच दरम्यान कोणीतरी अज्ञात चोरट्याने कारच्या क्लिनर बाजूच्या दरवाज्याची काच फोडली. कारच्या सीटवर एका फाइलखाली ठेवलेली १० लाख रुपये रोख रक्कम चोरट्याने लंपास केली. चोरी झालेल्या रकमेत प्रत्येकी १०० नोटांचे ५०० रुपये दराचे २० बंडल (प्रत्येकी ५० हजार रुपये) यांचा समावेश आहे. फिर्यादी यांनी २१ नोव्हेंबरला इगतपुरी पोलीस ठाण्यात तक्रार दाखल केली. त्यानुसार अज्ञात चोरट्याविरुद्ध भारतीय न्याय संहिता कलम ३०५ (क) अन्वये गु.र.नं. २५६/२०२६ नुसार गुन्हा नोंदवण्यात आला आहे. ह्या घटनेची माहिती मिळताच नाशिक ग्रामीणचे उपविभागीय पोलीस अधिकारी संजय बांबळे आणि पोलीस निरीक्षक घनशाम बळप यांनी घटनास्थळी भेट देऊन पाहणी केली व तपासाबाबत मार्गदर्शन केले. पुढील तपास पोलीस उपनिरीक्षक अमोल गायधनी हे करीत आहेत.

error: Content is protected !!