इगतपुरीनामा न्यूज – घोटी पोलीस ठाण्याच्या हद्दीत पूर्वमानसिकतेतून किंवा पूर्ववैमनस्यातून तरुणावर प्राणघातक हल्ला करून जीवे ठार मारण्याचा प्रयत्न केल्याची गंभीर घटना समोर आली आहे. या प्रकरणी घोटी पोलिसांनी अत्यंत अल्प वेळेत, म्हणजेच अवघ्या २ तासांत गोपनीय माहितीच्या आधारे मुख्य आरोपींसह ३ जणांना बेड्या ठोकल्या आहेत. पोलीस निरीक्षक विजय शिंदे, पोलीस उपनिरीक्षक प्रदीप भिंगारदे यांच्या मार्गदर्शनाखाली पोलीस अंमलदार गणेश देवकर, सागर सौदागर आणि गोपनीय शाखेचे कर्मचारी प्रकाश कासार यांच्या पथकाने ही धडक कारवाई केली आहे. मिळालेल्या माहितीनुसार, फिर्यादी अभिजीत भागा दोंदे,वय २२, रा. आंबेडकर नगर, घोटी हे आणि त्यांचे आत्येभाऊ दक्ष दत्ता सोनवणे हे आज ९ नोव्हेंबरला रात्री १२:४५ वाजेच्या सुमारास त्यांच्या मोटरसायकलने घोटी गावातून आंबेडकर नगरकडे जात होते. त्यावेळी बुद्धविहाराच्या पुढील भागात आरोपींनी त्यांची मोटरसायकल अचानक समोर उभी केली. या दरम्यान आरोपींनी शिवीगाळ व दमदाटी करत फिर्यादीच्या आत्येभाऊच्या पोटावर व तोंडावर चाकूने वार करून गंभीर जखमी केले व जीवे ठार मारण्याचा प्रयत्न केला. या प्रकरणी घोटी पोलीस ठाण्यात अभिजीत भागा दोंदे यांच्या फिर्यादीवरून बीएनएस कलम १०९(१), ३५१(२), ३५२, ३(५) नुसार गुन्हा दाखल केला आहे. याप्रमाणे निखिल नितीन नेटावटे, सोनू उर्फ सुरेश सुभाष रुपवते, दोघे रा. आंबेडकर नगर, राजवाडा, घोटी, आकाश राजेंद्र शिरसाट (रा. नांदगाव बुद्रुक, ता. इगतपुरी, ह. मु. बुद्ध कॉलनी, कुर्ला पश्चिम, मुंबई) या दोन आरोपींना अटक करण्यात आली आहे., तिसरा आरोपी जुव्हेनाईल (बालोपराधी) आहे. गुन्ह्याची गंभीरता लक्षात घेता, घोटी पोलीस ठाण्याच्या पथकाने तातडीने सूत्रे हलवली. गोपनीय माहितीच्या आधारे पोलिसांनी अवघ्या २ तासांच्या आत आरोपींना ताब्यात घेण्यात यश मिळवले. या घटनेमुळे घोटी परिसरात एकच खळबळ उडाली असून नागरिकांमधून पोलिसांच्या तत्पर कारवाईचे स्वागत होत आहे.
