इगतपुरीनामा न्यूज – ‘सेवा संकल्प अभियानांतर्गत’ इगतपुरी नगरपरिषदेतील स्वच्छता कर्मचाऱ्यांसाठी जिल्हाधिकारी कार्यालयात ‘कॉफी विथ कलेक्टर’ या विशेष संवादात्मक उपक्रमाचे आयोजन करण्यात आले होते. जिल्हाधिकारी आयुष प्रसाद यांनी स्वच्छता कर्मचाऱ्यांशी थेट संवाद साधत त्यांच्या अडीअडचणी, समस्या व मागण्या जाणून घेत त्या प्राधान्याने सोडविण्याचे स्पष्ट निर्देश संबंधित अधिकाऱ्यांना दिले. अधिकारी व कर्मचारी यांच्यातील संवाद अधिक प्रभावी करणे आणि तळागाळातील कर्मचाऱ्यांच्या अडचणी थेट समजून घेणे हा या उपक्रमाचा मुख्य उद्देश आहे. या माध्यमातून स्वच्छता कर्मचाऱ्यांच्या सेवा-सुविधा, कल्याणकारी योजना, सामाजिक सुरक्षा तसेच दैनंदिन कामातील आव्हानांवर चर्चा करण्यात आली. शहराची स्वच्छता व आरोग्य अबाधित ठेवण्यासाठी प्रतिकूल परिस्थितीतही अहोरात्र कार्यरत राहणाऱ्या स्वच्छता कर्मचाऱ्यांच्या योगदानाचे जिल्हाधिकारी आयुष प्रसाद यांनी विशेष कौतुक केले. ते म्हणाले की, “स्वच्छता कर्मचारी हे स्वच्छ व निरोगी शहराचे महत्त्वाचे आधारस्तंभ असून, त्यांच्या कल्याणासाठी प्रशासन पूर्णपणे कटिबद्ध आहे.” संवादादरम्यान कर्मचाऱ्यांनी त्यांच्या सामाजिक व आर्थिक सुरक्षेशी संबंधित गट विमा योजनेचा लाभ मिळणे, ५ टक्के आदिवासी भत्ता व प्रलंबित लाभ अदा करणे, पात्र कर्मचाऱ्यांना आयुष्मान भारत कार्ड उपलब्ध करून देणे, श्रमसाफल्य योजनेअंतर्गत हक्काचे घर उपलब्ध करून देणे ह्या प्रमुख मागण्या मांडल्या.
कर्मचाऱ्यांच्या या मागण्या सामाजिक व आर्थिक सुरक्षेच्या दृष्टीने अत्यंत महत्त्वाच्या असल्याने, त्यावर तात्काळ व प्राधान्याने कार्यवाही करण्याचे निर्देश जिल्हाधिकाऱ्यांनी इगतपुरीचे मुख्याधिकारी किशोर चव्हाण यांना दिले. स्वच्छता कर्मचाऱ्यांना सुरक्षित व सन्मानजनक निवासाची सुविधा मिळवून देणे ही प्रशासनाची महत्त्वाची जबाबदारी असल्याचे सांगत, ‘श्रमसाफल्य योजनेअंतर्गत’ पात्र कर्मचाऱ्यांना घरे देण्याच्या प्रक्रियेला विशेष गती देण्याचे आदेश त्यांनी दिले. या कार्यक्रमात PPT सादरीकरणाच्या माध्यमातून कर्मचाऱ्यांना स्वच्छता व्यवस्थापन, कचरा वर्गीकरण, घनकचरा व्यवस्थापन, स्वच्छतेच्या आधुनिक पद्धती तसेच नागरिकांमध्ये स्वच्छतेबाबत जनजागृती करण्याबाबत मार्गदर्शन करण्यात आले. तसेच, उल्लेखनीय व उत्कृष्ट कामगिरी करणाऱ्या स्वच्छता कर्मचाऱ्यांचा जिल्हाधिकारी आयुष प्रसाद यांच्या हस्ते सन्मानचिन्ह व सत्कार देऊन गौरव करण्यात आला. या संवादात्मक कार्यक्रमास अपर जिल्हाधिकारी हेमांगी पाटील, नगरपालिका प्रशासन विभागाचे सहअयुक्त श्याम गोसावी, इगतपुरी नगरपरिषदेचे मुख्याधिकारी किशोर चव्हाण, यशवंत पगार, तहसीलदार (संगायो) माधुरी आंधळे, अद्वैत कराळे, जीवन शहा आदी मान्यवर उपस्थित होते. स्वच्छता कर्मचारी हे इगतपुरी शहराचे प्रमुख शिलेदार असून त्यांच्या कल्याणासोबतच शहरातील स्वच्छता व्यवस्था अधिक प्रभावी करण्यासाठी प्रशासन नेहमी प्रयत्नशील राहील असा विश्वास यावेळी व्यक्त करण्यात आला.
