इगतपुरीनामा न्यूज – इगतपुरी पोलीस ठाण्याच्या हद्दीत समृद्धी महामार्गावरून मुंबई बाजूकडे जाणाऱ्या लेनच्या कडेला, इगतपुरी बोगद्याजवळ, इगतपुरी येथे प्राणी संरक्षण कायद्यांतर्गत मोठी कारवाई करण्यात आली आहे. सोमवारी १७ ऑगस्टला रात्रीच्या वेळी विनापरवाना व बेकायदेशीररीत्या गोवंश जनावरांचे मांस वाहतूक करणाऱ्या एका पिकअप चालकाविरुद्ध गुन्हा दाखल करण्यात आला आहे. पोलिसांनी अंदाजे १ हजार किलोग्राम वजनाचे, लहान-मोठ्या आकाराचे जनावरांचे मांस, पाय व इतर अवयव (प्रति किलो २२० रुपये प्रमाणे किंमत अंदाजे २ लाख २० हजार रुपये), एक पांढऱ्या रंगाची महिंद्रा कंपनीची पिकअप गाडी (क्रमांक- MH 04 LQ 8960, किंमत १ लाख रुपये) असा एकूण अंदाजे ३ लाख २० हजार रुपयांचा मुद्देमाल जप्त केला आहे. आरोपी मोहम्मद अशरफ अली अहमद सय्यद (वय २९ वर्ष, रा. मरियम मस्जिद जवळ, १३०७/२, इस्लाम नगर, हातमा नगर, भिवंडी, डांडेकावाडी, ठाणे ०२) याने त्याच्या ताब्यातील महिंद्रा कंपनीच्या पिकअप गाडीमध्ये (MH 04 LQ 8960) स्वतःच्या फायद्यासाठी गोवंश जनावरांचे मांस कत्तल करून बंदी असताना देखील विनापरवाना व बेकायदेशीर रीतीने वरील वर्णनाचे व किमतीचे मांस वाहतूक करताना आढळून आला. यामुळे नितीन गोविंद पाटील, वय २६ वर्ष, व्यवसाय: हॉटेल, रा. रो. हाऊस नंबर-३, मटाले चौक, सिडको, नाशिक यांच्या फिर्यादीवरून भारतीय न्याय संहिता २०२३ चे कलम ३२५, २७१ सह महाराष्ट्र प्राणी संरक्षण कायदा १९७६ चे सुधारित कलम ५(क) चे उल्लंघन ९, ९(अ) प्रमाणे गुन्हा दाखल झाला आहे. इगतपुरी पोलीस पुढील तपास करीत आहेत.
