इगतपुरीनामा न्यूज – इगतपुरी तालुक्यासह पूर्व भागात पावसाने ऐन दाणा भरण्याच्या वेळीच ओढ दिल्याने भातशेती पूर्णपणे करपून गेली आहे. हातातोंडाशी आलेले पीक डोळ्यांसमोर वाया गेल्यामुळे शेतकरी मोठ्या आर्थिक संकटात सापडला आहे. त्यातच विजेच्या लपंडावामुळे पिण्याच्या पाण्याचा प्रश्न गंभीर बनला असून, वनक्षेत्रातून बिबट्याचा वावर वाढल्याने शेतकऱ्यांच्या जीवितालाही मोठा धोका निर्माण झाला आहे. इगतपुरी तालुका दुष्काळग्रस्त घोषित झाला असल्याने बाधित शेतकऱ्यांना कोणत्याही जाचक अटींशिवाय सरसकट नुकसानभरपाई मिळाली पाहिजे. पावसाच्या लहरीपणामुळे पिकांचे नुकसान झाले असून उत्पादनाचा खर्चही निघणे कठीण झाले आहे. महावितरणने तांत्रिक अडचणी तातडीने दूर करून शेतीपंपांसाठी नियोजित वेळेत सुरळीत वीजपुरवठा करावा. शासनाने कागदपत्रांची जाचक अट शिथिल करून नुकसानभरपाईच्या प्रक्रियेला गती द्यावी अशी मागणी राष्ट्रवादी काँग्रेसचे इगतपुरी तालुकाध्यक्ष पांडुरंग वारुंगसे यांनी केली आहे.
बाधित शेतकऱ्यांना कोणत्याही जाचक अटींशिवाय सरसकट आर्थिक मदत जाहीर करावी. पंचनामे व कागदपत्रांची किचकट प्रक्रिया सुलभ करून मदत मिळण्याच्या प्रक्रियेला गती द्यावी. महावितरणने शेतीपंपांसाठी वेळापत्रकानुसार अखंडित व सुरळीत वीजपुरवठा करावा. ग्रामीण व वाडी-वस्ती भागात पिण्याच्या पाण्याची सोय तातडीने करावी अशीही त्यांची मागणी आहे. पावसाअभावी करपणाऱ्या पिकांना पाणी देण्याची अत्यंत गरज असताना, महावितरणच्या अनियमित वीजपुरवठ्यामुळे सिंचनाचे नियोजन पार विस्कळीत झाले आहे. तालुक्यातील धरणांमध्ये पाणी उपलब्ध असूनही, विजेच्या अभावामुळे गाव, वाडी, वस्ती व शिवारात पिण्याच्या पाण्याची तीव्र टंचाई निर्माण झाली आहे. जमिनीतील ओलावा पूर्णपणे संपल्यामुळे खरीप पीक तर वाया गेलेच आहे, पण रब्बीचा हंगामही हातचा जाण्याची भीती निर्माण झाली आहे. त्यामुळे आगामी काळात उदरनिर्वाह कसा करायचा, या चिंतेत शेतकरी वर्ग आहे. तालुक्यात घनदाट वनक्षेत्र असल्याने परिसरात बिबट्यांसह इतर वन्यजीवांचा वावर मोठ्या प्रमाणावर वाढला आहे. रात्रीच्या वेळी बिबट्याचे दर्शन होत असल्याने शेतात पाणी देण्यासाठी किंवा रात्रीच्या वेळी बाहेर पडताना शेतकऱ्यांच्या जिवाला धोका निर्माण झाला आहे. शेतीचे नुकसान, पाणीटंचाई, विजेचा लपंडाव आणि बिबट्याची दहशत अशा दुहेरी-तिहेरी संकटांत शेतकरी पुरता हतबल झाला आहे.